धनगढी- कैलालीको धनगढीमा फुटबल प्रशिक्षण केन्द्र निर्माण गरिने भएको छ । सुदूरपश्चिम खेलकुद परिषद्, धनगढी उपमहानगरपालिकाको समन्वय र अखिल नेपाल फुटबल संघ एनफाको स्वीकृतिमा धनगढी स्थित फूलबारीमा फुटबल प्रशिक्षण केन्द्र निर्माण गरिने भएको हो ।
कैलाली जिल्ला फुटबल संघका महासचिव ललित मिश्रले धनगढी उपमहानगरपालिका–१४ डिपोबजार क्षेत्रमा प्रशिक्षण केन्द्र निर्माण गरिने बताए । सुदूरपश्चिममै पहिलो पटक फुटबल प्रशिक्षण केन्द्र निर्माण गर्न १ करोड ३४ लाख ३३ हजार बजेट विनियोजन गरिएको छ ।
अखिल नेपाल फुटबल संघको २०८१ भदौ ११ र १३ गतेको बैठकले कैलालीमा फुटबल प्रशिक्षण केन्द्र निर्माण गर्न बजेट विनियोजन गर्ने निर्णय गरेको हो ।
संघका महासचिव मिश्रले सुरुमा विस्तृत योजना प्रतिवेदन डिपीआर तयार गरिने बताए । धनगढीमा निर्माण हुने फुटबल प्रशिक्षण केन्द्रमा खेलाडीहरूलाई आवाससहितको सेवा दिइने छ ।
संघका महासचिव मिश्रले खाना र बस्नको सुविधा सहितको केन्द्र निर्माण हुने बताए । कैलालीमा निर्माण गरिने प्रशिक्षण केन्द्रले सुदूरपश्चिम प्रदेशका खेलाडीहरूलाई सहज हुने अपेक्षा गरिएको छ ।