अत्तरिया- ओपिडीमा आएका विरामीलाई भर्ना गरी उपचार गर्नका लागि गेटा अस्पतालमा साउन ३२ गतेदेखि इन्डोर सेवा शुरु गरिए पनि भर्ना गर्नुपर्ने विरामी आएका छैनन् ।
अस्पताल प्रशासनले इन्डोर सेवा शुरु गरेको एक साता हुँदा पनि भर्ना गरी उपचार गर्नुपर्ने विरामी एक जना पनि नआएको अस्पताललले जनाएका छ । अस्पतालका सूचना अधिकारी नैनसिंह कार्कीले बिहिबार सम्म भर्ना गरी उपचार गर्नुपर्ने विरामी नआएको बताए ।
‘बहिरंग सेवा लिन आएका विरामीलाई भर्ना गरी उपचार गर्नुपर्ने अवस्थामा भर्ना गरी उपचार गर्ने गरी अन्तरंग सेवा शुरु गरिएको छ,’ उनले भने, ‘तर, भर्ना गरी उपचार गर्नुपर्ने विरामी नआएको हुँदा हालसम्म अन्तरंग सेवा लिने विरामी संख्या शुन्य छ ।’
२०८० कात्तिक १ गते देखि बहिरंग सेवा शुरु गरी गेटा अस्पतालले सेवा दिन शुरु गरेको थियो । अस्पतालमा सुविधा सम्पन्न ल्याब, अप्रेसन थियटर र विशेषज्ञ सेवा उपलब्ध छ । हाल बहिरंग सेवा लिन दैनिक ४० देखि ४५ जना विरामी आउने गरेको अपस्तालका मेडिकल सुपरिन्टेन्डेन्ट विल्पल सापकोटाले बताए ।
उनले विरामीहरुलाई हाडजोर्नी, स्त्रीरोग, फिजिसियन, जनरल सर्जरी, रेडियोलोजी लगायतका विशेषज्ञ सेवा दिइरेको बताए । गेटा अस्पतालमा दुई जना अर्थोपेडिक सर्जन, एक जना स्त्रीरोग विशेषज्ञ, एक जना जनरल फिजिसियन, एक जना जनरल सर्जन, दुई जना रेडियोलोजिष्ट र एक जना एनेष्थेसियोलोजिष्ट डाक्टर कार्यरत छन् । सूचना अधिकारी कार्कीका अनुसार गेटा अस्पतालमा अहिले सबै क्षेत्रका गरी ७१ जना कर्मचारी मध्ये १३ जना विशेषज्ञ डाक्टर र मेडिकल अफिसर कार्यरत छन् ।
हाल सञ्चालित सेवाहरु दिनका लागि अस्पतालमा पर्याप्त चिकित्सक र उपकरण भएपनि विरामी नआएको अस्पतालले जनाएको छ । ‘हाललाई सञ्चालन गरिएको सेवा दिनका लागि पर्याप्त जनशक्ति छ,’ सूचना अधिकारी कार्कीले भने, ‘विरामी आएपछि हामीले सेवा दिन सक्छौं ।
अहिलेलाई सामान्य अप्रेसन गर्नको लागि ओटी पनि तयारी अवस्थामा छ । ठूलो अप्रेसन गर्न नपर्ने तर भर्ना गरी उपचार गर्नुपर्ने विरामी आए भर्ना गरेर उपचार गर्नका लागि वार्डहरु रेडी छन् ।’
अस्पतालले स्वास्थ्य तथा जनसंख्या मन्त्रालयसंग थप १४१ जना जनशक्ति माग गरेको छ । विरामी आउन थालेपछि आकस्मिक सेवा समेत सञ्चालन गर्ने तयारी रहेको अस्पतालका सुपरिन्टेन्डेन्ट डा. सापकोटाले बताए। उनले छिट्टै स्तन क्यानसरको जाँच गर्नका लागिका मेमोग्राफी सेवा पनि शुरु गरिने बताए । उनले मेसिन आएर जडान गर्ने कार्य भइरहेको बताए । अस्पतालमा एमर्जेन्सी वार्ड समेत तयारी अवस्थामा छ ।
गेटा अस्पतालले फिजियोथेरापी, अल्ट्रासाउन्ड, इन्डोस्कोपी, एक्स रे, इको, ईसिजि, कार्डियोग्राफी लगायतका प्रयोगशाला सेवा दिइरहेको छ । तर, विरामी संख्या कम भएकोले पनि गेटा अस्पतालमा अहिले सेवा लिन छिटो छरिटो रहेको अस्पतालका सूचना अधिकारी कार्कीले बताए ।
गेटामा विश्वविद्यालय सञ्चालनका लागि नेपाल सरकारले करिब ८ अर्ब रुपैयाँ खर्च गरेर अस्पताल, कलेज, अडिटोरियम, क्वाटर, फोहोर व्यवस्थापन केन्द्र, खानेपानी, ढल निकास लगायतका भव्य संरचना निर्माण गरेको छ । विश्वविद्यालय सञ्चालनका लागि राष्ट्रिय सभाबाट शहिद दशरथ चन्द स्वास्थ्य विज्ञान विश्वविद्यालय सञ्चालन सम्बन्धी व्यवस्था गर्न बनेको विधेयक पारित भइसकेको छ भने प्रतिनिधि सभामा छलफलकै क्रममा छ ।