कञ्चनपुर- इजरायलमा हमास समुहको आक्रमणमा परी मारिएका दार्चुलाका दिपेशराज विष्टको महाकाली नदीमा अन्त्येष्टी गरिएको छ । मृतक विष्टको सोमबार बिहान धार्मिक परम्परा अनुसार कञ्चनपुर स्थित महाकाली नदीमा अन्त्येष्टी गरिएको हो ।
इजरायबाट आइतबार मात्रै काठमाडौँ शव ल्याईएको थियो । आइतबार सेती अस्पतालमै शव राखिएको र सोमबार बिहानै भीमदत्त नगरपालिका १५ निम्बुखेडा स्थित कान्छा बाबु पुष्पराज विष्टको निवासबाट शव यात्रा निकालिएको थियो ।
बिएस्सी एजी अध्ययन गरेर स्वदेशमै रोजगारी गर्ने सपना बोकेका दिपेशको इजरायलमा मारिएको १६ औँ दिनमा महाकालीमा अन्त्येष्टी गरिएको छ । दिपेशको सपना महाकाली नदीमै बिलयी भएको छ ।
गत २० असोजमा हमास समुहले ईजरायलमा हमला परेको थियो । सोही हमलामा परेर सुदूरपश्चिम विश्वविद्यालय टीकापुर कृषि क्याम्पसमा अध्ययनरत विष्ट सहितका १० विद्यार्थीको मृत्यु भएको थियो । मृतक दिपेशका आफन्त एव कञ्चनपुरका विद्यार्थी नेता वीरेन्द्र राज विष्टले धार्मिक परम्परा अनुरुप अन्त्येष्टी गरिएको बताए ।
हमास समुहको हमलामा परेर मृत्युवरण गरेका सुदूरपश्चिम विश्वविद्यालय बिएस्सी एग्रिकल्चर अध्ययन गरेर ‘लन एण्ड अर्न’ कार्यक्रम अन्गर्तत ईन्टन गर्न गएका सुदूरपश्चिमका सात विद्यार्थीले ज्यान गुमाएका छन् भने एक जना अझै वेपत्ता भएका छन् ।
२७ भदौँमा ‘लन एण्ड अर्न’ कार्यक्रम अन्तर्गत सुदूरपश्चिम विश्वविद्यालय टीकापुर क्याम्पसका ४९ जना विद्यार्थी त्यहाँ गएका थिए । मातृभूमि छाडेको महिना दिन नपुग्दै विद्यार्थीका लागि अकल्पनिय घटना भएको थियो ।
लेकम गाँउपालिका ५ दार्चुलाका २४ वर्षीय दिपेशराज विष्ट बाल्यकालदेखि नै कञ्चनपुर महेन्द्रनगर बस्दै आएका थिए । बाल्यकालमै बाबु गुमाएका दिपेशराज सानैदेखि नै महेन्द्रनगर बस्दै अध्ययन गर्दै आएका आएका थिए ।
आमा पार्वती विष्ट पहाडकै घरमा बस्दै आएकी छिन् । दिपेशकी आमा लटिनाथ मावि रिठाचौपाताकी शिक्षिका हुन् । दिपेशराजका बाबु पनि मालिकार्जुन मावि धाप दार्चुलामा पूर्वशिक्षक थिए ।
दिपेशराजले झण्डै १८ बर्ष अघि नै बाबु गुमाएका थिए । बाबु गुमाएकाले उनको काँधमा अभिभावकत्वको पनि जिम्मेवारी थियो । भाई बसन्त राज विष्टले छात्रबृत्तिमा धरान मेडिकल कलेजमा एमबिबिएस अध्ययन गर्दै आएका छन् ।
उनी नर्सरीदेखि १० सम्म ग्लोबल एकेडेमीमा अध्ययन गरेर रेडियन्ट माविबाट आईएस्सी अध्ययन गरेर बिएस्सी एजि विषय अध्ययनका लागि टीकापुर गएका थिए । भीमदत्त नगरपालिका १५ निम्बुखेडा स्थित कान्छाबाबु पुष्पराज विष्टको घरमा बस्दै आएका थिए । सानैका बाबु गुमाएका दिपेशराज समझदार विद्यार्थी थिए ।
इजराइल पुगेपछि कान्छी आमा जयन्तीसंग टेलिफोन गरेर आफ्नो काम राम्रो भएको बारे जानकारी गराएका थिए । स्व। दिपेशका ठूलाबाबु हरिराज विष्टले दिपेशराज सानैदेखि मेहनती र नेपाल (स्वदेश) मै केही गर्न खोजेको बताए ।
‘पढ्नेक्रममै उसको स्वदेशमै लोकसेवा लड्ने सोंच थियो, ‘उनले भने, ‘दिपेशराजलाई विदेश भन्दा पनि स्वदेशमै केही गरु भन्ने सोच थियो, विदेशी भूमिमा गएर आफै विलायो, हाम्रो परिवारमा यतिबेला बज्रपात मच्चिएको छ ।’ दिपेशराज गुमाएको पीडाले विष्ट परिवारमा सन्नटा छाएको छ ।