कञ्चनपुर- कञ्चनपुरमा डेंगीको संक्रमण बढ्दै गएको छ । बर्खायामको सुरुवातसँगै जिल्लामा डेंगीको संक्रमण बढन थालेको हो ।
जिल्ला स्वास्थ्य कार्यालयका अनुसार हालसम्म यहाँ ३९ जनामा संक्रमण देखिएको छ । तर कुन स्थानीय तहमा कति देखिएको छ भन्ने तथ्यांक भने छैन ।
प्रदेश स्वास्थ्य निर्देशनालयले पठाएको तथ्यांकमा ३९ जनामा संक्रमण देखिएको जिल्ला स्वास्थ्य कार्यालयका प्रमुख वरिष्ठ जनस्वास्थ्य अधिकृत दयाकृष्ण पन्तले बताए । उनका अनुसार हालसम्म जिल्ला स्वास्थ्य कार्यालयमा प्राप्त तथ्यांक अनुसार महाकाली प्रादेशिक अस्पतालमा ६ जनामा मात्रै डेंगी संक्रमण देखिएको छ ।
‘प्रदेशबाट ३९ जनामा संक्रमणको तथ्यांक आएको छ,’ उनले भने, ‘तर कहाँको कति छ भन्ने केही जानकारी आएन ।’ सेती प्रादेशिक अस्पताललगायत अन्य अस्पतालमा परीक्षण गरिएकाहरुको रिपोर्ट प्रदेशमा संकलन भएको हुन सक्ने उनले बताए ।
गत वर्ष जिल्लामा १७५ जनामा संक्रमण देखिएको थियो । त्यतिबेला सबै स्थानीय तहले संक्रमण रोकथामका लागि अभियान नै चलाएका थिए । गत वर्ष भदौ र असोजमा धेरै केशहरु देखिएका थिए । तर अहिले असारदेखि नै देखिन थालेका छन् ।
सुदूरपश्चिम प्रदेश स्वास्थ्य निर्देशनालयका अनुसार यो बर्ष सन २०२३ मा दार्चुलामा प्रदेशमै सबैभन्दा बढी १८८ जनामा डेंगु संक्रमण देखिएको छ ।
‘यसपटक पनि हामीले रोकथामका लागि अभियान सुरु गर्नुपर्ने देखियो,’ वरिष्ठ जनस्वास्थ्य अधिकृत पन्तले भने, ‘अब स्वास्थ्य कार्यालयले मात्रै नियन्त्रण गर्न सक्ने अवस्था छैन ।’ उनले सबै पालिकामा रोकथामका लागि डेंगी सार्ने लामखुट्टे मार्न तथा पानी जम्ने खाल्डा खुल्डीहरु पुर्नका लागि पत्राचार गरिने बताए । महेन्द्रनगर बजार र आसपासका क्षेत्रमा खाल्डा खुल्डी पुर्नका लागि सुरक्षाकर्मीको सहयोग पनि मागिने उनले बताए ।
महाकाली प्रादेशिक अस्पतालमा फाट्टफुट्ट रुपमा डेंगीका बिरामीहरु आउन थालेका छन् । निमित्त मेडिकल सुपरिटेन्डेन्ट डा। अर्जुन भट्टका अनुसार हालसम्म सामान्य लक्षण देखिएका बिरामी मात्रै आएका छन् । ‘प्लेटलेट्स कम भएका बिरामी आएका छैनन्, सामान्य लक्षण देखिएका मात्रै आएका छन्,’ उनले भने, ‘परीक्षण पनि नियमित भइरहेको छ ।’ उनका अनुसार अहिले आवश्यक टेस्ट किटहरु पनि उपलब्ध छन् ।
जिल्ला स्वास्थ्य कार्यालयले पनि सबै पालिकामा केही टेस्ट किटहरु पठाउने तयारी गरेको छ । त्यसले मात्रै पर्याप्त नहुने भएकाले स्थानीय तहहरुले पनि खरिद गरेर परीक्षण गर्नुपर्ने पन्त बताउँछन् ।
प्रदेश स्वास्थ्य निर्देशनालय दिपायलका अनुसार सुदूरपश्चिममा वैशाखयता सुदूरपश्चिममा २०२३ मा २७९ जनामा संक्रमण देखिएको छ । सबैभन्दा बढी दार्चुलामा १८८, कञ्चनपुरमा ३९ जनामा संक्रमण देखिएको छ । यसैगरी अछाममा १७, कैलालीमा १४, बझाङमा ६, बैतडीमा ५, बाजुरा र डोटीमा ४र४ तथा डडेलधुरामा २ जनामा संक्रमण देखिएको छ ।
