बैतडी- सुदूरपश्चिम प्रदेशमा सवारी दुर्घटना आधाले घटेको छ। तीनवर्षको तथ्यांक हेर्दा सवारी दुर्घटना घटेको पाइएको छ। गत आर्थिक वर्ष २०७९/०८० मा यहाँ २४९ सवारी दुर्घटना भएका छन्। यो अघिल्लो वर्ष २०७८र०७९ भन्दा आधा भन्दा कम रहेको प्र्रदेश ट्राफिक प्रहरी कार्यालयको तथ्यांकले देखाएको छ ।
आर्थिक वर्ष २०७८/०७९ मा यहाँ ५०१ सवारी दुर्घटना भएकोमा गत आव २०७९/०८० मा घटेर २४९ पुगेको सुदूरपश्चिम प्रदेश ट्राफिक प्रहरी कार्यालय अत्तरियाका प्रमुख तथा प्रहरी उपरिक्षक (एसपी) नेत्रमण गिरीले जानकारी दिए। यस्तै आर्थिक वर्ष २०७७/७८ मा पाँच सय ५८ सवारी दुर्घटनामा भएका थिए।
सवारी दुर्घटना कमी भएसंगै अंकभंग र मृत्यु हुनेको संख्या पनि घटेको छ।
गत आर्थिक वर्ष २०७९/०८० मा यहाँ दुईसय ४९ सवारी दुर्घटनामा परेर १७७ जनाको मृत्यु भएको छ भने ४६३ घाइते भएका छन्।
आर्थिक वर्ष २०७८/०७९ मा पाँचसय एक सवारी दुर्घटनामा एकसय ९६ जना ज्यान गुमाएका छन्। आर्थिक वर्ष २०७७/७८ मा ५५८ सवारी दुर्घटनामा एकसय ८६ जनाको मृत्यु भएको छ। भने सयौँ अंगभंग भएका छन्।
ट्राफिक प्रहरीको सक्रियताले दुर्घटना न्यूनीकरणमा सहयोग पुगेको प्रहरी उपरिक्षक (एसपी) गिरीले दाबी गरे। ‘ट्राफिक प्रहरी सडकमा बढी खटिएकोले सवारी दुर्घटनामा कमी आएको हो’, उनले भने, ‘हामीले गरेको जनचेतनामूलक कार्यक्रम पनि फलदायी भएको छ।’
गत आवमा प्रदेशभरी चार हजार ६३ जनचेतनामस्लक कार्यक्रम सञ्चालन गरिएका छन्। जुन अघिल्लो वर्षको तुलनामा तीन हजारले बढी रहेको छ। अघिल्लो आवमा एक हजार मात्रै जनचेतनामूलक कार्यक्रम गरिएका प्र्रदेश ट्राफिक प्रहरी कार्यालयले जनाएको छ।
यात्रुवाहक बस दुर्घटना नपरेका कारण पनि जनधनको ठूलो क्षति हुनबाट जोगिएको हो। दुर्घटना न्यूनीकरणका लागि विभिन्न प्रयास भइरहेका छन्। सवारी दुर्घटना न्यूनीकरणका लागि प्रहरीले छड्के चेकजाँच, टाइम कार्डदेखि ‘रिफ्रेस रेन्टर’को अभ्यास भइरहेको प्रमुख गिरीको भनाइ छ।
दुर्घटना न्यूनीकरणका लागि ट्राफिक प्रहरीले विद्यालय स्तरमा जनचेतनामूलक कार्यक्रम र यातायात व्यवसायी र चालकलाई समेत बेलाबेलामा सचेत गराउने कार्य गरेको छ। ‘नियमित चेकसँगै जनचेतनामूलक सन्देश दिँदै आएका छौँ’, उनले भने, ‘प्रदेशभर विभिन्न सडकखण्डमा सचेतनामूलक होर्डिङ बोर्ड राखेका छौँ। चालकसँग एक मिनेट कार्यक्रम सञ्चालनमा छ।’
दुर्घटनाका मुख्य कारण ट्राफिक नियमको पालना नगर्नु, सवारी साधानको चाप बढ्दै जानु, यात्रु र चालकको दुवैको लापरबाही र सडकको अवस्थालगायतका कारण छन्।
कारबाहीबाट साढे छ करोड राजस्व संकलन
सुदूरपश्चिम प्रदेशमा एक वर्षमा करिब साढे ६ करोड रुपैयाँ सवारी कारबाहीबाट राजस्व संकलन भएको छ। प्रदेश ट्राफिक कार्यालयका प्रमुख गिरीका अनुसार गत आर्थिक वर्ष २०७९र०८० मा सवारी कारवाहीबाट ६ करोड ४२ लाख १२ हजार राजस्व संकलन भएको छ। यो आर्थिक वर्ष २०७८र०७९ भन्दा एक करोडले बढी हो। सो वर्ष पाँच करोड ४१ लाख ९४ हजार राजस्व संकलन भएको थियो।
प्रदेशमा गत आवको एक वर्षको अवधिमा १५ हजार नौसय ६० नयाँ सवारीसाधन दर्ता भएका छन्। सवारी साधन थपिँदै जानु र ट्राफिक प्रहरीको उपस्थिति बढी हुनुले राजस्व संकलन बढेको जनाएको छ।
सुदूरपश्चिममा १८८ जनाको मात्रै दरबन्दी रहेको भए पनि हाल २६३ ट्राफिक प्रहरी कार्यरत रहेका छन्। प्रदेशभरीका नौ जिल्लामा गरेर ५५ वटा ट्राफिक एकाइ रहेका छन्।
