बैतडी- बैतडीको तल्लोस्वराड क्षेत्रको व्यापारिक केन्द्र मेलौली बजार अव्यवस्थित फोहरका कारण दुर्गन्धित बन्दै गएको छ। तल्लोस्वराड क्षेत्रको प्रवेशद्वारका रूपमा समेत चिनिले मेलौली बजार जथाभावी फालिएको फोहरले दुर्गन्धित बनेको हो।
जताततै फालिएको फोहरले मेलौली बजारसँगै बसपार्क क्षेत्र दुर्गन्धित बनेको स्थानीय व्यवसायी मोहनसिंह नेगीले बताए। नगरपालिका कार्यालय जोड्ने बाटो समेत पर्ने बजार क्षेत्रमा जथाभावी फालिएको फोहरका कारण कुरूप बन्दै गएको छ।
जताततै फोहर थुपार्दा सास्ती भोग्नुपरेको स्थानीय देवबहादुर चन्दले बताए। उनले भने, ‘जताततै फालिएको फोहरले एकदमै सास्ती भएको छ। सहज रूपमा हिँडडुल गर्न समस्या छ। दुर्गन्धले एकातिर हिँडडुल गर्न समस्या छ भने अर्कोतिर श्वास फेर्न गाह्रो भइरहेको छ।’
नगरपालिकाको फोहर पनि सडक किनारमै फालिने गरेको गुनासो छ। फोहरले नाली र ह्युमपाइप जाम भएका छन्। सिसाका बोतल, प्लाष्टिक लगायतका फोहर जथाभावी फाल्दा खेतबारीमा काम गर्ने समस्या भइरहेको स्थानीय भागरथी चन्दले बताए।
उनले भने, ‘फोहरले खेतबारीमा पनि काम गर्न असहज भइरहेको छ। सिसा, प्लाष्टिक, काट्न लगायतका फोहरले धाँज काट्न समस्या हुने गरेको छ। बच्चालाई पनि हिँडडुल गर्न समस्या छ।’
जथाभावी फालिएको फोहरले मानव स्वास्थ्यमा पनि गम्भीर असर पर्ने स्वास्थ्यकर्मीले जनाएका छन्।
नगरपालिकासँग फोहर व्यवस्थापनका लागि पटक पटक आग्रह गर्दा पनि कुनै पहल नभएको स्थानीयको आरोप रहेको छ। फोहर व्यवस्थापनका लागि नगरपालिकालाई पटक पटक आग्रह गर्दा पनि कुनै सुनुवाइ नभएको व्यवसायी नेगीले बताए।
उनले भने, ‘जथाभावी फालिने फोहर व्यवस्थापनका लागि नगरपालिकालाई पटक पटक गुहारिसक्यौं तर नगरपालिकाले कुनै चासो दिएको छैन।’
नगरपालिकाले फोहर व्यवस्थापन गर्ने भने पनि डम्पिङ साइट नहुँदा समस्या भएको मेलौली नगरपालिकाकी उपप्रमुख पार्वती विष्टले बताइन्।
उनले भनिन्, ‘अव्यवस्थित फोहर व्यवस्थापनका लागि डम्पिङ साइटका लागि ठाउँ खोजिरहेका छौँ। डम्पिङ साइटकोे टुंगो लागेपछि जतिसक्दो चाँडो फोहर व्यवस्थापन गर्छौं।’