धनगढी- सुदूरपश्चिम प्रदेश प्रहरीका कमाण्डर तथा प्रहरी नायव महानिरीक्षक (डिआइजी) अशोक सिंहले फागुन १० गते पदबाट राजीनामा दिए। जन्म मिति प्रकरणमा तानिएका उनले विवादमा परेपछि राजीनामा बुझाएका थिए। जन्म मिति फेरेर नागरिकता पेश गरेको विषयमा अनुसन्धान हुने र सेवाबाट बर्खास्त हुने सम्भावना बढेपछि उनले राजीनामा दिएका थिए। उनको नागरिकताको जन्म मितिलाई लिएर अख्तियार दुरुपयोग अनुसन्धान आयोगमा उजुरी परेको थियो।
नागरिकतामा उनको जन्म मिति विसं २०२४ हुनुपर्नेमा उनको शैक्षिक प्रमाणपत्रमा भने विसं २०२५ रहेको छ। जुन मिति नै प्रहरीको सिट रोलमा उल्लेख गरिएको थियो। डिआइजी सिंह सुदूरपश्चिम प्रदेशका प्रहरी प्रमुख थिए। त्यतिमात्र होइन, उनी नेपाल प्रहरीको नेतृत्व गर्ने तहमा पुग्ने सम्भावनासमेत देखिरहेका थिए। यही चैत ११ गते सेवा अवधिको कारण हालका महानिरीक्षक धीरजप्रताप सिंहले अवकाश पाउँदै छन्।
त्यसपछि प्रहरी महानिरीक्षकमा नियुक्ति पूर्व डिआइजी सिंहको ब्याचले पाउनेछ। त्यसको सम्भावनामा सिंह पनि दाबेदार थिए। तर उजुरी परेपछि सिंहले राजीनामा दिए र उनको राजीनामा स्वीकृत पनि भइसकेको छ। उनीमाथि जन्म मिति प्रकरणको आरोप मात्र होइन, सुदूरपश्चिमको प्रहरी प्रमुख रहँदाका बखत प्रहरी अधिकारीहरूमाथि अत्याचार गरेको आरोप पनि लागेको छ।
स्रोत भन्छ, ‘सिंहले अति गरेका थिए, ड्युटी सकेर कोठामा सुतिरहेको प्रहरी जवान र प्रहरी हवलदारको कोठामै प्रवेश गरेर केरकार गर्ने गरेका थिए।’ प्रदेश प्रहरी कार्यालय स्रोतका अनुसार सुदूरपश्चिमको एकमहिने बसाइका क्रममा डिआइजी सिंहले ६ जना प्रहरीलाई बर्खास्त गरेका थिए। कैलाली कारागारमा कार्यरत ४ जनासहित ६ जनालाई मादक पदार्थ सेवन (मापसे) गरेको आरोप लगाउँदै सिंहले जागिरबाट बर्खास्त गरेर घर पठाएको बताइएको छ।
ती प्रहरी अधिकृतले भने‚ ‘उहाँ (सिंह) अहिले त आफैँ राजीनामा दिएर घर गइसक्नुभयो तर बहालवाला हुँदा प्रहरी कर्मचारीलाई साह्रै दुःख दिनुभयो। ती दुःख जति पोखे पनि कमै हुन्छन्,’ एक प्रहरी अधिकृतले भने, ‘ड्युटीमा हुँदा आचरणविपरीत काम गरे कारवाही गर्नु ठीकै हो तर डिआइजी साबले बिना कारण प्रहरी जवान र हवलदारहरूको जागिर खाइदिनुभयो। उनीहरूका पनि घरमा छोराछोरी, श्रीमती छन् होला। त्यही भएको जागिर पनि बिनाकारण गएपछि समस्या भएनरु’
सिंह राति पनि प्रहरी कर्मचारी सुतेकै कोठामा पुगेर केरकार गर्ने गरेको दाबी स्रोतको छ। ती प्रहरी अधिकृतका अनुसार डिआइजी सिंहले प्रहरी कर्मचारीहरुसँग निकै तल्लो स्तरको व्यवहार गर्ने गरेका थिए। सोही कारण कतिपय प्रहरीले उनको बर्हिगमनमा पनि खुशीयाली मनाएको चर्चा प्रहरी वृत्तमा छ।
उनी माघ पहिलो साता सुदूरपश्चिमको प्रहरी प्रमुख भएर आएका थिए। सुदूरपश्चिमकै स्थानीय बासिन्दा समेत रहेका सिंहले हेडक्वार्टरका उच्च पदस्थ अधिकृतसँग जोरी खोज्दा प्रहरी मुख्यालयबाटै जन्म मिति घटाएर डिआइजीमा बढुवा भएको सूचना सञ्चारमाध्यममा चुहिएको स्रोतको दाबी छ।
सुदूरपश्चिमको प्रमुख भएर आएपछि लागुऔषध नियन्त्रण महाअभियानको थालनी र २४ घण्टा प्रहरी कर्मचारीलाई सडकमा उभ्याएपछि चर्चा र लोकप्रियता कमाएका उनले केही सफलता प्राप्त गरे। तर उनले तल्लो तहका प्रहरी कर्मचारीहरूसँग गर्ने व्यवहार भने अपाच्य नै हुने गरेको अधिकारीहरूको भनाइ छ।
