धनगढी– कैलालीको धनगढीमा आजदेखि प्रादेशिक देउडा प्रतियोगिता सुरु भएको छ। सुदूरपश्चिमको सामाजिक विकास मन्त्रालयले प्रबद्र्धनमा देउडा प्रतिष्ठान केन्द्रको आयोजनामा धनगढीको साहित्य समाजको प्राङ्गणमा आजदेखि तीन दिनसम्म देउडा प्रतियोगिता सुरु भएको हो । प्रतियोगिताको उद्घाटन प्रमुख अतिथि सुदूरपश्चिमकी मन्त्री सन्तोष थापा शर्माले गरेकी हुन्।
सुदूरपश्चिम र कर्णालीको मौलिकता झल्किने देउडाको संरक्षण, संवद्र्धन, प्रवद्र्धन र राष्ट्रिय तथा अन्तराष्ट्रियस्तरमा प्रचार प्रसार गर्ने उद्देश्यले डेउडा प्रतियोगिता गरिएको देउडा प्रतिष्ठान केन्द्रका वरिष्ठ उपाध्यक्ष सुरत रावल ‘डोटेली कान्छा’ले बताए । प्रतियोगितामा सुदूरपश्चिमका ९ वटै जिल्लाबाट समुहको सहभागी रहेको उनले बताए ।
प्रतियोगितामा प्रथम हुने समूहलाई ५० हजार नगदसहित प्रमाणपत्र, द्वितीयलाई ४०, तृतीयलाई ३० र सान्त्वना हुने समूहलाई २० हजार नगदसहित प्रमाणपत्र प्रदान गरिने छ । प्रतियोगिताको सभाध्यक्ष प्रतिष्ठानका अध्यक्ष दलबहादुर बोगटी रहेका थिए ।
