बैतडी– बैतडीको पाटन नगरपालिका–१ को कार्यालयले अवैध मदिराको कारोबारमा रोक लगाएको छ। अवैध मदिराको कारोबारले समाजमा विभिन्न खालका समस्या आएकाले कारोबारमा पूर्ण रोक लगाइएको वडाध्यक्ष तर्कसिंह ठगुन्नाले बताए। वडालाई मदिरा निषेधित क्षेत्र घोषणा गरेको भएपनि अवैध रुपमा मदिराको कारोबार भइरहेको व्यापक जनगुनासो आएकाले वडा कार्यालयले सूचना प्रकाशन गरेर त्यस्तो कार्यमा संलग्न हुनेहरूलाई कारबाही गर्ने चेतावनी पनि दिएको छ।
अवैध मदिराका कारणले महिला हिंसा लगायतका अपराध बढ्न थालेका वडाध्यक्ष ठगुन्नाले बताए। उनले भने, ‘हामीले अवैध मदिराको कारोबारमा पूर्ण रुपमा रोक लगाएका छौं। कसैले विक्रि–वितरण गरेको पाइएमा कानुन अनुसार कारबाही गर्छौं।’ वडाको सूचनाको अवज्ञा गरेर कसैले मदिराको कारोबार गरेमा नगरपालिका तथा वडाबाट पाइने सेवा सुविधाबाट वञ्चित गरिने वडा कार्यालयले जनाएको छ।
वडाभित्र कसैले मदिराको कारोबार गरेमा उसको तीनपुस्ते समेत सार्वजनिक गरिने वडा कार्यालयले जनाएको छ। यस्तै, सामाजिक सुरक्षा भत्ता, सिफारिस लगायतका सेवा सुविधा नदिने वडाध्यक्ष ठगुन्नाले बताए।
‘हामीले समाजलाई सभ्य बनाउन यो निर्णय गरेका हौं। यसको पालनाका लागि सबैलाई आग्रह गरिरहेका छौं’, उनले भने। ग्रामीण क्षेत्रमा मदिराकै कारण महिलामाथि हुने हिंसा तथा मानसिक समस्या समेत बढेकाले कारोबारमा रोक लगाउन आवश्यक देखिएको वडा नम्बर १ का सामुदायिक मनोसामाजिक कार्यकता मालती बिष्ट बोहराले बताइन्।
मदिराको कारोबारमा रोक लगाउने निर्णयको महिलाहरूले स्वागत गरेका छन्। यसको कार्यान्वयनमा थप दबाब सिर्जना गर्ने बिष्टले बताइन्।उनले भनिन् ‘मदिराकै कारण धेरै हिंसाका घटनाहरू भइरहेका छन्। यसको कारोबारमा रोक लगाउने निर्णय निकै राम्रो छ। यसलाई कार्यान्वयन गर्नुपर्ने हुन्छ।’
