बैतडी- बैतडीको पुर्चौडी नगरपालिकाका विद्यार्थीले कक्षा १२ सम्म निःशुल्क पढ्न पाउने भएका छन्। कक्षा ११ र १२ का लागि लाग्ने शुल्क नगरपालिकाले तिरिदिन थालेपछि विद्यार्थीले निःशुल्क पढ्ने अवसर पाएका हुन्। चुनावी घोषणापत्रमा कक्षा १२ सम्म निःशुल्क शिक्षा दिने घोषणाअनुसार विद्यार्थीको शुल्क नगरपालिकाबाट बेहोर्न थालिएको नगर प्रमुख दीपकबहादुर बमले बताए।
आर्थिक अवस्था कमजोर भएका बालबालिकालाई माथिल्लो कक्षामा टिकाउन चुनौती बढ्दै गएपछि नगरपालिकाले विद्यार्थीको शुल्क दिन थालेको हो। ‘गरिबीका कारण धेरै विद्यार्थीले पढ्न पाएका छैनन,’ नगरप्रमुख बमले भने, ‘गाउँमै कक्षा १२ सम्म निःशुल्क पढन पाएपछि विद्यालय छोड्ने दरमा कमी आउने थालेको छ।’ माथिल्लो कक्षा चढ्दै जाँदा आर्थिक व्ययभार बढ्दै जान्छ। आर्थिक समस्याकै कारण माथिल्लो कक्षा छाड्ने दर बढ्दै गएको छ। बीचमै कक्षा छाड्ने विद्यार्थीको संख्या घटाउन नगरपालिकाले शिक्षामा लगानी गर्न थालेको नगरपालिकाका प्रमुख प्रशासकीय वीरबहादुर नेपालीले बताए।
नगरपालिकाभित्रका आठवटा विद्यालयमा कक्षा ११–१२ का विद्यार्थीको मासिक शुल्क नगरपालिकाले विद्यालयको खातामा पठाउन थालेपछि विद्यार्थीहरूले सहज रूपमा पढ्न पाएका छन्। नगरपालिकाले गुणस्तरीय शिक्षा गाउँमै सहज रूपमा सबैले लिन सकून् भन्ने ध्येयले शिक्षक व्यवस्थापन, भौतिक व्यवस्थापन र अन्य व्यवस्थापनका क्रियाकलाप सञ्चालन गरेको नगर प्रमुख बमले बताए।
पाठ्यक्रम, पाठ्यपुस्तक, विद्यालयको भौतिक सुविधा, पठनपाठनको वातावरण एवं मूल्यांकनले गुणस्तरीय शिक्षामा भूमिका खेल्ने भएकाले यसतर्फ नगरपालिकाले ध्यान दिइरहेको नगरप्रमुख बमले जानकारी दिए शैक्षिक गुणस्तर सुदृढीकरण एवं कार्यसम्पादनमा आधारित प्रोत्साहन अनुदान, आर्थिक वा सामाजिक कारणले शिक्षा लिनबाट वञ्चित भएका, विद्यालयसम्म पहुँच नपुगेकाहरूका लागि पनि नगरपालिकाले विभिन्न कार्यक्रम ल्याएको बताइएको छ। शैक्षिक सामग्री, छात्रावृत्तिलगायत प्राविधिक धारका विद्यार्थीहरूको लागि विभिन्न योजना ल्याएको नगरपालिकाले बताएको छ।