डोटी- डोटीमा एक जना सुत्केरी स्वास्थ्यकर्मी महिलाको ज्यान गएको छ । जिल्लाको आदर्श गाउँपालिका वडा नम्बर ६ गिरिचौकाकी ३२ वर्षीया जानकी खडायतको ज्यान गएको हो । जिल्ला अस्पताल डोटीमा उनको बुधवार साँझ मृत्यु भएको जिल्ला अस्पताल डोटीका डाक्टर सोहन शाहले जानकारी दिएका छन् ।
अस्पताल पुगेको १० मिनेटमै उनले मृत बच्चा जन्माएकी थिइन् । बच्चा जन्माएको करिब डेढ घण्टामा उनको मृत्यु भएको हो । मृत बच्चा जन्माएकी उनको उच्च रत्तश्राबका कारण मृत्यु भएको डाक्टर शाहले बताए । सुत्केरी भएपछि रगत धेरै बग्न थालेपछि अस्पतालका डाक्टर प्रकाश ठकुल्ला लगायतका चार जना डाक्टरको टोली उनको उपचारमा खटिएको थियो । डाक्टरहरूले बचाउने ठुलो प्रयास गरेको भए पनि उनलाई बचाउन नसकिएको अस्पताल स्रोतले जनाएको छ ।
जिल्ला बाहिर रेफर गर्ने तयारी भएको थियो, डाक्टर शाहले भने, एम्बुलेन्स पनि तयारी अबस्थामा थियो, रेफर गर्दा रगत रोकेर पठाउनु पर्ने हुन्छ, रगत रोक्ने विधिको प्रयोग गर्दागर्दै उनको मृत्यु भयो ।
पेटको बच्चा चल्न छोडेपछि उनी भिडियो एक्स-रे गराउन जिल्ला अस्पताल डोटी आएको अस्पताल स्रोतले बताएको छ । उपचारमा संलग्न डाक्टरका अनुसार उनको पेटमा भएको बच्चा दुई तिन दिन अगाडी नै मरिसकेको थियो । उनको सुत्केरी हुने समय एक महिना पछाडिको थियो ।
उनको ९ वर्षको एक बच्चा छ । पहिलो पटक उनी सुत्केरी हुँदा अप्रेसन गरी बच्चा निकालिएको थियो । तर दोस्रो पटक सामान्य सुत्केरी भए पनि बाच्न सकिनन् ।
२०७० सालबाट स्वास्थ्य क्षेत्रमा प्रवेश गरेकी उनले ओजेटि जिल्ला अस्पताल डोटीमै गरेकी थिइन् । हाल उनी गिरिचौका स्वास्थ्य चौकीमा अनमीको रूपमा कार्यरत थिइन् ।
