अत्तरिया, १४ जेठ– गेटा मेडिकल कलेज सञ्चालनका लागि दबाव दिन संघर्ष समिति अत्तरियाले सञ्चालन गरेको हस्ताक्षर अभियानमा करिब १५ हजार हस्ताक्षर संकलन गरिएको छ ।
शुक्रबार र शनिबार दुईदिन सञ्चालन गरिएको उक्त अभियानमा सो संख्यामा हस्ताक्षर संकलन भएको सघर्ष समितिले जनाएको छ । संकलन गरिएको उक्त हस्ताक्षर आइतबार (आज) बिहान १० बजे जिल्ला प्रशासन कार्यालय कैलाली मार्फत प्रधानमन्त्रीको कार्यालयलाई बुझाईने संघर्ष समितिका संयोजक लोक राज पाण्डे (आगो) ले जानकारी दिएका छन ।
यसैबिच समितिले हस्ताक्षर अभियानमा सहभागि हुने सम्पूणर्लाई धन्यावाद ज्ञापन समेत गरेको छ । भोली नेपाल सरकारको बजेट भाषण कार्यक्रम पनी भएको हुँदा बजेटको प्रकृती हेरी संघर्षका थप कार्यक्रमबारे टुंगो लगाईने संयोजक पाण्डेले बताएका छन् ।
अत्तरियामा संघर्ष समितिले बुधबार देखि यथासिघ्र प्रस्तावित गेटा मेडिकल कलेज संचालनका लागि माग गर्दै आन्दोलन गर्दै आएको छ । समितिले आगामी आर्थिक बर्षका लागि बजेट बिनियोजन गरी मेडिकल कलेजको मोडालिटी निर्धारण गरी नीति निर्माण नगरिए थप संघर्षका कार्यक्रम संचालन गर्ने जनाएको छ ।
गेटामा मेडिकल कलेज सञ्चालनका लागि पूर्वाधार तयार गरिएको छ । तर सरकारले अहिलेसम्म सञ्चालनको प्रारुप भने टुंगो लगाएको छैन् । मेडिकल कलेजको कार्ययोजनाले २०७७ सालदेखि अस्पताल र शैक्षिक कार्यक्रम सञ्चालन गर्ने लक्ष्य लिएको थियो । तर अहिलेसम्म पनि कुनै विश्वविद्यालयको सम्बन्धनमा वा छुट्टै प्रतिष्ठानको रूपमा सञ्चालन गर्ने भन्ने निक्र्यौल भएको छैन् ।