धनगढी, १२ फागुन– शेयर सदस्य ३० हजारभन्दा बढी रहेको नवजीवन सहकारी संस्था लिमिटेडको नेतृत्वका लागि रतन कठायत पक्षले समेत आफ्नो प्यानल घोषणा गरेको छ ।
नवजीवनका पूर्व अध्यक्ष समेत रहिसकेका कठायतको प्यानलमा उपाध्यक्षमा चेतराज ओझा, सुदस्यहरुमा उत्तम जोशी, रोम स्वाँर, केशवराज मिश्र, गणेश वम, गोपाल चौधरी, कृष्णबहादुर चौधरी, जयराज जोशी र पूणर् जोशीको उम्मेदवारी रहेको छ ।
त्यसैगरी उपेन्द्र विष्ट, भीमबहादुर बलायर, राधिकाकुमारी चौधरीको उम्मेदवारी पनि सदस्यमा रहेको छ । कठायतको प्यानलबाट लेखा समितिमा चेतराज जोशी, लक्ष्मीराज पन्त र सीता विक उम्मेदबार रहनु भएको छ । प्यानल घोषणाको क्रममा अध्यक्षका उम्मेदवार कठायतले नवजीवन सहकारीलाई थप व्यवस्थित र पूणर् प्रविधिमैत्री बनाइने बताएका छन् ।
हाल १० वटा सेवा केन्द्रहरुबाट सेवा प्रदान गर्दै आएको नवजीवन सहकारीले चार अर्ब १२ बचत सङ्कलन गरेको छ । सो संस्थाले तीन अर्ब ७० करोड रुपियाँ कर्जा लगानी गरिसकेको छ । संस्थामा हाल ६४ करोड रुपियाँको पूँजी कोष कायम रहेको जनाइएको छ । यसअघि नै मंगलबार देवबहादुर वम पक्षले पनि आफ्नो प्यानल घोषणा गरिसकेको छ ।
