धनगढी, १० माघ– सुदूरपश्चिम प्रदेशमा सोमबार थप ५५० जनामा कोरोना पुष्टि भएको छ । प्रदेशका विभिन्न स्थानमा पछिल्लो २४ घण्टामा १ हजार ५४७ नमुना परीक्षण गर्दा थप ५५० जनामा संक्रमण पुष्टि भएको स्वास्थ्य निर्देशनालय डोटीले जनाएको छ ।
निर्देशनालयका अनुसार ३६३ नमुना पिसिआर गर्दा २२४ जना र एक हजार १८४ नमुना एन्टिजेन विधिबाट परीक्षण गर्दा ३२६ जनामा संक्रमण देखिएको हो । त्यस्तै २४ घण्टामा ६३ जना संक्रमित निको भई डिस्चार्ज भएका छन् । पछिल्लो २४ घण्टामा भारतबाट फर्किएका १०३ जनामा संक्रमण पुष्टि भएको छ ।
निर्देशनालयले दिएको जानकारी अनुसार गौरीफन्टा नाकामा ३१ जना, गड्डाचौकी नाकामा ६६ जना, झुलाघाट नाकामा ३ जना र पुलघाट नाका दार्चुलामा ३ जना गरी १०३ जनामा संक्रमण देखिएको हो ।
त्यस्तै पछिल्लो २४ घण्टामा धनगढी उपमहानगरपालिका १ का ७७ बर्षीय कोरोना संक्रमित वृद्धको मृत्यु भएको निर्देशनालयले जनाएको छ ।
