कञ्चनपुर- कञ्चनपुरको वेदकोट नगरपालिकाले १७ औँ नगर अधिवेशन मंगलबार नगर प्रमुख भोजराज बोहराको अध्यक्षतामा सम्पन्न भएको छ ।
अधिवेशनमा नगर उपप्रमुख तुलसी जोशी, प्रमुख प्रशासकीय अधिकृत हरिदत्त भट्ट, वडा अध्यक्षहरू, कार्यपालिका सदस्यज्यूहरू, वडा समितिका पदाधिकारीहरू तथा नगरपालिकाका विभिन्न शाखा प्रमुखहरूको उल्लेखनीय उपस्थिति रहेको थियो ।
अधिवेशनले आगामी आर्थिक वर्ष २०८२/०८३ का लागि रु. ९८ करोड ६५ लाख २१ हजार ९५६ को बजेट पारित गरेको छ । अधिवेशनमा विभिन्न नयाँ कार्यक्रम र योजनाहरू सार्वजनिक गरिएको थियो ।
जसअनुसार: एक विद्यालय, एक नर्स कार्यक्रम लागू गरिनेछ ।, कोल्ड स्टोर सञ्चालनको तयारी गरिनेछ ।, लामो समयदेखि करार र ज्यालादारीमा कार्यरत कर्मचारीहरूलाई सामाजिक सुरक्षा कोषमा समावेश गरिनेछ ।, शान्ति सुरक्षाका लागि नगर प्रहरीको व्यवस्था गरिने ।, आयुर्वेदिक स्वास्थ्य केन्द्रको स्थापना र सञ्चालनमा आवश्यक तयारी गरिनेछ ।, दैजीमा आँखा उपचार केन्द्र स्थापना गरिनेछ ।, दैनिक ज्यालादारीमा कार्यरत कर्मचारीहरूलाई मासिक ज्यालादारी प्रणालीमा रूपान्तरण गरिनेछ ।
नगर प्रमुख बोहराले नगर विकासमा सबै पक्षको सहकार्य आवश्यक रहेको उल्लेख गर्दै जनताको सेवामा अझ बढी उत्तरदायी र पारदर्शी हुने प्रतिबद्धता जनाउनुभयो ।
