कञ्चनपुर– व्यावसायिक तरकारी खेतीमा संलग्न किसानलाई शुक्लाफाँटा नगरपालिकाले ५० प्रतिशत अनुदानमा उन्नतजातको आलुको बीउ वितरण गरेको छ । आलुखेतीलाई प्रवर्द्धन गर्ने उद्देश्यले नगरपालिकाको कृषि विकास शाखाले १ सय २० किसानलाई १ सय क्विन्टल आलुको बीउ वितरण गरेको हो ।
वडा कार्यालयले तीन वर्ष देखि निरन्तररूपमा व्यावसायिक तरकारी खेतीमा संलग्न किसानको नाम छनोट गरी पठाएपछि सोही आधारमा आलुको बीउ वितरण गरिएको कृषि विकास शाखका प्रमुख करन सिंह बुढा ऐरले बताए । ‘छनोटमा परेका नगरपालिकाको १२ वटै वडाका ८ किसानलाई १ क्विनटलका दरले आलुको बीउ वितरण गरेका छौँ’, उनले भने, ‘वडाका २ जना किसानलाई आलुको मूल बीउ १ सय ५० दानाका दरले वितरण गरिएको छ ।’
शिलबन्दी दरभाउ पत्र अनुसार खरिदकर्ताको छनोट गरी आलुको बीउ खरिद गरी किसानलाई वितरण गरिएको शाखा प्रमुख बुढाऐरको भनाइ छ । किसानलाई कार्डिनल, डिजिरे, जनकदेव, एमएस, खुमलटार रातो आलुको बीउ वितरण गरिएको छ । आलुको बीउ खरिदका लागि र ३ लाख ६१ हजार रकम खर्च गरिएको छ ।
नगरपालिकाको वडा नं ३ को पिपलाडी, जोनापुर, वडा नं २ को लक्ष्मीपुर, वडा नं ४ को असैना, वडा नं ६ को कसरौल, वडा नं ८ को बेलडाँडी, वडा नं ९ को नौखरी, वडा नं ११ को कलुवापुर र वडा नं १२ को कालागौंडी क्षेत्रका किसानले व्यावसायिक रूपमा आलुखेती गर्दै आएका छन् । सबै भन्दा बढी बेलडाँडी, जोनापुर, पिपलाडी क्षेत्रका किसानले आलुखेतीलाई व्यावसायिक रूपमा गर्दै आएका छन् ।
कृषि विकास शाखाका अनुसार नगरपालिका क्षेत्रमा २ सय हेक्टर क्षेत्रफलमा उन्नतजातको आलुखेती हुने गरेको छ । जसको उत्पादन प्रतिहेक्टर ११ मेट्रिक टन रहेको छ । उन्नत जातको आलुखेती सँगै नगरपालिकामा १ सय हेक्टर क्षेत्रफलमा स्थानीय जातको आलुखेतीलाई किसानले निरन्तर रूपमा अगाडि बढाउँदै अएका छन् । जसको उत्पादन ६ दशमलव ५० मेट्रिक टन हुने गरेको छ ।
आलुखेतीलाई विगत एक दशक देखि निरन्तर रूपमा व्यावसायिक रूपमा गर्दै आएका नगरपालिकका वडा नं ३ का किसान चेतराज चौधरीले नगरपालिकाले अनुदानमा आलुको बीउ वितरण गरेर किसानको हौसला बढाएको बताए । कृषि ज्ञान केन्द्रले पनि प्रत्येक वर्ष नगरपालिका क्षेत्रमा स्थानीय जातको आलुखेती गर्ने किसानलाई अनुदानमा आलुको बीउ र प्रविधिमा सहयोग पुर्याउँदै आएको छ । जिल्लामा सबै भन्दा बढी आलु उत्पादन हुने क्षेत्रका रूपमा शुक्लाफाँटा नगरपालिका परिचित रहेको छ । (रासस)
