कञ्चनपुर- कञ्चनपुरस्थीत महेन्द्रनगरको मदन चोक बन्द गरिएको छ। स्थानीय व्यापारीहरूले महेन्द्रनगरको केन्द्र मदन चोकबाट राजमार्गतर्फ जाने बाटो बन्द गरेका छन् । महेन्द्रनगरको बजार क्षेत्रका अन्य सडकको निर्माण करिब पूरा भएपनि नगरको मुख्य चोक अलपत्र पारेको भन्दै बाटो बन्द गरेको उनीहरूले बताएका छन्।,
चोक अलपत्र बनेपछि पानी जम्ने, ढुङ्गा उछिट्टिने र ढुङ्गा उछिट्टिएर व्यापारीका सटरहरूमा लाग्ने समस्या हुने गरेको भुवन जोशीले बताए। त्यसपछि आफूहरूले बसपार्कतर्फ जाने बाटो बन्द गरिदिएको उनले बताए । आक्रोशित व्यापारीले बन्दको अवज्ञा गर्ने केही मोटरसाइकल चालकमाथि हातपात पनि गरेका छन्।
भीमदत्त नगरपालिकाको ४ नम्बर वडाका अध्यक्ष सुशील भट्टले सडकका ढुङ्गा हटाउन गरेको अनुरोधको वास्ता नगरेपछि सडक नै बन्द गर्न बाध्य हुनुपरेको व्यापारीहरूको भनाई रहेको बताए । व्यापारीहरूले सडकमा डोरीको अवरोध लगाएर त्यसमा वडाध्यक्ष भट्टको फोटो टाँसेका छन्। सडकमा पानी जम्ने र ढुङ्गा उछिट्टिने समस्या समाधान नभएसम्म बाटो बन्द रहने व्यापारीले बताएका छन् ।
एसियाली विकास बैंक (एडिबी) सहयोगको सडक निर्माण आयोजनाले नगरका अन्य सडकको निर्माण लगभग गरिसके पनि मदन चोकलाई भने छोडेको छ । सडक निर्माणमा अवरोध बनेका भीमदत्त नगर विकास समितिको स्वामित्वका २२ सटर भत्काउन नगरपालिकाले आनाकानी गरेपछि एडिबीले मदन चोकलाई छोडेको बताइएको छ।
