टीकापुर- कैलालीको टीकापुरमा तेस्रो राष्ट्रव्यापी खुला पुरुष भलिबल प्रतियोगिता हुने भएको छ । आउँदो चैत ३ गतेबाट लागुऔषध दुर्व्यसनी न्यूनीकरणका लागि जनचेतनामूलक साँस्कृतिक कार्यक्रम सहित तेस्रो राष्ट्रव्यापी खुला पुरुष भलिबल प्रतियोगिता हुन लागेको हो ।
विगत दुई वर्षदेखि भलिबल प्रतियोगिता तथा लागुऔषध दुर्व्यसनी विरुद्धको अभियान सञ्चालन गर्दै आएको सिर्जनशील युवा समाज नेपालको गुडिमुन्टे समुहले प्रतियोगिताको आयोजना गरिएको बताएको छ ।
खेलकुदमा युवाहरुलाई जोड्न र आपराधिक घटनाहरुमा न्यूनीकरण गर्ने उद्देश्यले भलिबल प्रतियोगिता सहितको जनचेतनामूलक कार्यक्रम आयोजना गर्दै आएका हौं । कार्यक्रम संयोजक नन्दसिंह विकले भने, ूखेलले युवाहरुलाई जागरुक बनाउने र जनचेतनामूलक कार्यक्रमले अभिभावकलाई सचेत गराउने हाम्रो उद्देश्य हो । उनले प्रतियोगिताले स्थानीय खेलाडीहरुलाई प्रोत्साहन र सिकाइ हुने विश्वास व्यक्त गरे ।
भारतसँगको खुला सिमानका कारण लागुऔषधका घटनाहरू दिनप्रतिदिन बढ्दै गएको भन्दै नागरिकहरूले चिन्ता गरिरहेका बेला खेलको मनोरञ्जनसँगै समाजलाई सचेत गर्ने कार्यमा कार्यक्रम फलदायी बन्ने विश्वास गरिएको गुडिमुन्टे समुहका संयोजक राजेन्द्र विश्वकर्माले बताए । उनले विगतमा पनि प्रहरी प्रशासनको समन्वय र टीकापुर नगरपालिकाको सहयोगमा समुहले समुदायस्तरमा अभियान सञ्चालन गरेको बताउँदै भलिबल प्रतियोगिता कार्यक्रममा प्रत्येक दिन फरकफरक जनचेतनामूलक नाटक मञ्चन गरिने बताए ।
समाजमा युवाहरु बेरोजगार छन् । काम नहुँदा युवा फुर्सदिला बन्दा आपराधिक घटना बढ्दै गएका छन् । समुहका संयोजक विश्वकर्माले भने, ‘हामीसँग भएको ज्ञान् र सिपबाट समाजलाई फाइदा हुन्छ भन्ने ठानेर यो कार्यक्रमलाई निरन्तरता दिँदै आएका छौं । समुहका सल्लाहकार भरत भण्डारी भलिबल खेलमा सम्भावना भएका तर अवसर नपाएका खेलाडीहरुका लागि प्रतियोगिता लाभदायक बन्ने बताए । उनले सुदुरपश्चिममा अन्य खेल भन्दा भलिबल बढी लोकप्रिय रहेको बताउँदै विगतका वर्षमा पनि प्रतियोगितामा खेलाडीहरुको राम्रो सहभागिता रहेको बताए ।
‘हामी खेलकुद प्रतियोगितालाई प्रतियोगितामै सिमित नराखेर त्यसबाट समाजलाई फाइदा हुनेगरी काम गर्दै आएका छौं ।’ प्रतियोगितामा आएका खेलाडीहरुको अनुभवलाई आदानप्रदान गराउनुका साथै नयाँ खेलाडीहरुलाई हौसला दिने काम गर्दै आएका छौं । भण्डारीले भने, ‘अर्कोतिर लागुऔषधका कारण बिग्रेको युवा पुस्ता नै भएकोले त्यसलाई सचेत गर्ने गरी नाटकको माध्यमबाट सचेतना फैलाउने काम हुन्छ ।
प्रतियोगितामा प्रथम हुने टिमले एक लाख नगद, मेडल, ट्रफी र प्रमाणपत्र प्राप्त गर्ने छ । त्यस्तै दोस्रो हुने टिमले ६० हजार नगद, तेस्रो हुनेले ३० हजार नगद, मेडल, ट्रफी र प्रमाणपत्र प्राप्त गर्ने छ भने, शान्त्वना हुने टिमले सात हजार नगद सहित प्रमाणपत्र प्राप्त गर्नेछ । प्रतियोगितामा उत्कृष्ट पाँच विधामा खेलाडीलाई पुरस्कृत गरिने आयोजकले बताएको छ ।
