बैतडी- बैतडीको दशरथचन्द नगरपालिकामा सम्पन्न नगरस्तरीय महिला टी–२० क्रिकेट प्रतियोगिताको उपाधि दनपा-२ देहिमाडौंले हात पारेको छ। आज सम्पन्न फाइनल खेलमा दनपा ८ त्रिपुरालाई ७ विकेटले स्तब्ध पार्दै देहिमाडौंले उपाधिमाथि कब्जा जमाएको हो। उपाधि हात पारेसँगै देहिमाडौंले नगद २५ हजार, ट्रफी, मेडल हात पार्यो। त्रिपुराले भने नगद १५ हजार, ट्रफी मेडल र प्रमाणपत्रमा चित्त बुझायो।
जितका लागि पाएको ६० रनको सामान्य लक्ष्य देहिमाडौंले ७.५ ओभरमा ३ विकेटको क्षतिमा पूरा गर्यो। जसमा कप्तान पिंकी बोहराले अविजित २०, मनीषा बोहराले ११ र कविता बोहरा अविजित १० रनको योगदान गरिन्। त्रिपुराका लागि करिश्मा थापा, जानकी थापा, जानवी मौनीले १र१ विकेट हात पारे।
त्यसअघि निंग्लाशैनी खेल मैदानमा टस जितेर पहिला ब्याटिङ गरेको त्रिपुरा १४।३ ओभरमा ५९ रनमा अलआउट भयो। उसका लागि माया टमटाले १० रन बनाउनुबाहेक अन्यले दोहोरो अंकमा रन जोड्न सकेनन्। देहिमाडौंका लागि निर्मला बोहरा, आरति बोहरा, वसन्ती बोहराले ३र३ विकेट हात पारे। देहिमाडौंकी वसन्ती बोहरा ओम्यान अफ द फाइनल भएको स्कोरर द्रोपती कुँवरले जानकारी दिइन्।
यसैबीच प्रतियोगिताभर व्यक्तिगत १४९ रन र ५ विकेट हात पारेकी देहिमाडौंकी कप्तान पिंकी बोहरा सर्वोत्कृष्ट खेलाडी चुनिइन्। उनले ३ हजार पुरस्कार पाइन्। यस्तै १० विकेट हात पारेकी देहिमाडौंकी वसन्ती बोहरा उत्कृष्ट बलर, १४९ रन बनाएकी देहिमाडौंकी पिंकी बोहरा उत्कृष्ट ब्याटर चुनिइन्। दुबैले जनही एक हजार पाँच सय पुरस्कार पाए।
यस्तै दनपा-९ ग्वाल्लेकको टोली अनुशासित टोली घोषित हुँदै तीन हजार पायो। दनपा-१० बाराकोटकी प्रियांशी चन्द उदीयमान खेलाडी चुनिदै एक हजार रुपैयाँ पुरस्कार पाएको प्रशिक्षक दीपेन्द्र बोहराले बताए। सहिद दिवसको अवसरमा दशरथचन्द नगरपालिकाको वार्षिक कार्यक्रम र नगर खेलकुद विकास समितिको आयोजनामा माघ ९ गतेदेखि शुरु भएको प्रतियोगितामा नगरका ७ टोली सहभागी थिए। यस प्रतियोगितामा सहभागी खेलाडीको हौसला बढाउन प्रत्येक खेलमा खाजा खर्च स्वरूप जनही १५० का दरले खेलाडीलाई नगद दिइएको दशरथचन्द नगर खेलकुद विकास समिति अध्यक्ष भूपेन्द्र चन्दले जानकारी दिए।
यस्तै समापन समारोहमा दशरथचन्द नगरपालिकाभित्र रहेका अन्तरराष्ट्रिय खेलाडीलाई दोसल्ला र कदरपत्रसहित सम्मान गरिएको प्रतियोगिता संयोजक वीरसिंह बोहराले बताए। यहाँबाट अन्तरराष्ट्रिय खेल खेलिससेका रीतु कनौजिया, अञ्जली चन्द, द्रोपती कुँवर, रेखा रावल र जानकी भट्टलाई सम्मान गरिएको हो।
समापन समारोहमा दशरथचन्द नगरपालिकाका प्रमुख पुस्करराज जोशी लख्खाभाइले खेलकुद क्षेत्रमा सबैभन्दा बढी बजेट विनियोजन गरेर खेलकुदलाई प्राथमिकतामा राखिएको र खेलाडीको क्षमता अभिवृद्धिसँगै भौतिक पूर्वाधार निर्माणमा पनि जोड दिइएको बताए। नगरले वार्षिक क्यालेन्डर निकालेर त्यसका खेलकुद प्रतियोगिताका कार्यक्रमहरू बढीभन्दा बढी राखिने उद्घोष गरे। दक्ष खेलाडी उत्पादन गर्ने हेतुले प्रतियोगिता आयोजना गरेको निकट भविष्यमै अन्य खेलकुदका प्रतियोगिता सञ्चालन गरिने दशरथचन्द नगर खेलकुद विकास समिति अध्यक्ष भूपेन्द्र चन्दले जानकारी दिए।
