कञ्चनपुर- चिसो सुरु भएसँंगै सुदूरपश्चिममा डेंगीको संक्रमण पनि घटेको छ । एकरडेढ महिनाअघिसम्म पनि तीव्र गतिमा बढिरहेको संक्रमण अहिले फाटफुट रूपमा मात्रै देखिइरहेको छ । एक महिनाअघिको तुलनामा संक्रमण निकै कम भएको प्रदेश स्वास्थ्य निर्देशनालयले जनाएको छ ।
पछिल्लो एक महिनामा ७५ जनामा संक्रमण देखिएको छ । जुन अघिल्लो महिनाको तुलनामा आधाभन्दा कम हो । ‘अहिले त निकै कम भइसकेको छ, फाटफुट रूपमा एकरदुई केश मात्रै आउन थालेका छन्,’ प्रदेश स्वास्थ्य निर्देशनालयका भेक्टर कन्ट्रोल निरीक्षक हेमराज जोशीले भने, ‘चिसोमा लामखुट्टेको वृद्धिविकास कम हुन्छ, अहिले बाहिर जमेको पानी पनि सुकिसकेको छ ।’
निर्देशनालयका अनुसार सुदूरपश्चिम प्रदेशमा जनवरीदेखि नोभेम्बरसम्म १२ सय ८७ जनामा डेंगी संक्रमण देखिएको थियो । डेंगीबाट कैलालीमा २, कञ्चनपुर र अछाममा १र१ जना गरी ४ जनाको मृत्यु भएको छ । पछिल्लो ११ महिनाको अवधिमा सबैभन्दा बढी कैलालीमा ४३० र दार्चुलामा ३३८ जनामा डेंगी संक्रमण देखिएको छ ।
यसैगरी कञ्चनपुरमा २२१, बैतडीमा ७३, अछाममा ४०, डडेल्धुरामा ४२, बझाङमा ३३ र बाजुरामा २६ जनामा संक्रमण देखिएको प्रदेश स्वास्थ्य निर्देशनालयले जनाएको छ । असोज र कात्तिक अन्तिमसम्म पनि प्रदेशका सबै जिल्लामा संक्रमण दर बढ्दो अवस्थामा थियो । त्यतिबेला परीक्षणका लागि कीटको अभाव चर्केको थियो । कतिपय पालिकाले कीट खरिद गरेर परीक्षण गरेका थिए । अहिले भने संक्रमण नगण्य अवस्थामा रहेको जोशीले बताए ।
