धनगढी, १ मंसिर– नेकपा (एमाले) को १० औ महाधिवेशनका लागि कैलाली क्षेत्र नम्बर २ बाट जिल्ला अध्यक्ष रतन थापाले निर्वाचन प्रक्रियाभन्दा बाहिर गएर एकलौटीरुपमा प्रतिनिधि छनौट गरेको भन्दै अर्को पक्षले निर्वाचनद्धारा प्रतिनिधि छान्ने भएको छ ।
भेलाले सर्वसम्मतरुपमा वा निर्वाचनका माध्यामले प्रतिनिधि छनौट गर्न सक्छ सो पार्टीका प्रदेश कमिटी सदस्य तथा महाधिवेशनका प्रत्यासी महादेव वजगाईले बताए । ‘महाधिवेशनका लागि ४३ जनाले उम्मेदवारी दर्ता गरिसकेको अवस्थामा एकलौटीरुपमा प्रतिनिधि छनौट गरिनु प्रक्रिया विपरितको काम हो’ वजगाईले भने ‘त्यसैले हामी चुनाव भाग लिन्छौ ।
आफूहरुले निर्वाचन कमिटी, जिल्ला कमिटी, प्रदेश र केन्द्रलाई समेत उम्मेदवारको अन्तिम नामावली सार्वजनिक भइसकेकोले निर्वाचन प्रक्रिया अगाडि बढाइ दिन आग्रह गरेको उनले बताए । निर्वाचन प्रक्रिया अगाडि बढाउनका लागि महाधिवशेन प्रतिनिधिका प्रत्यासी महादेव वजगाई, सूर्यबहादुर थापा, रुपबहादुर रावल, मनोज थ्यात,लालबहादुर बोगटी, विरेन्द्र रावल,खरप्रसाद अधिकारी,दलबहादुर रावल,बसुन्धरा भण्डारी,गंगा थापा, यज्ञराज ढुंगाना र दलबहादुर थापाले विभिन्न तहमा निवेदन दिएका थिए ।
एउटाले घोषणा गर्दा अर्को पक्षले भेला गरेर प्रतिनिधि छान्ने प्रक्रिया देशभर नै पहिलो घट्ना भएको अनुमान छ । भेला गर्नेहरु एमालेको १० बुँदे पक्षधर हुन ।
क्षेत्र नम्बर २ मा ६ खुला र तीन महिला प्रतिनिधि छानिने व्यवस्था छ । जिल्ला अध्यक्ष रतन थापाले आफू सहित डेजी पाण्डे, नरबहादुर खड्का, दलबहादुर विष्ट, गजेन्द्र स्वाँर, धर्म थापा, कमला ओली, टीका थापा र पदमपुरा थापालाई महाधिवेशन प्रतिनिधि छानिएको घोषणा गरेका छन् ।