धनगढी- कैलालीको भजनी नगरपालिका र कञ्चनपुरको लालझाडी गाउँपालिकामा विपद्को समयमा नसर्ने रोगबाट प्रभावित नागरिकलाई सुरक्षित राख्ने उद्देश्यसहित कृत्रिम घटना अभ्यास कार्यक्रम सुरु गरिएको छ। नेपाल रेडक्रस सोसाइटी को आयोजनामा सञ्चालन भइरहेको उक्त अभ्यास “पेन–डी परियोजना” अन्तर्गत सञ्चालन गरिएको हो।
कार्यक्रममा विपद्का बेला मधुमेह, उच्च रक्तचाप, मुटुरोग लगायत नसर्ने रोगबाट पीडित व्यक्तिहरूले भोग्नुपर्ने समस्या, उपचारमा हुने अवरोध तथा आवश्यक प्रतिकार्यका विषयमा अभ्यासात्मक प्रस्तुति गरिएको छ। परियोजनाका संयोजक प्रमोद अधिकारीका अनुसार कैलालीको भजनी नगरपालिका र कञ्चनपुरको लालझाडी गाउँपालिका मा एकैसाथ उक्त अभ्यास सञ्चालन भइरहेको छ।
“विपद्को समयमा नसर्ने रोग भएका व्यक्तिहरू सबैभन्दा बढी जोखिममा पर्छन्। उनीहरूको उपचार, औषधि व्यवस्थापन र उद्धारलाई व्यवस्थित बनाउन यो अभ्यास महत्वपूर्ण हुनेछ,” संयोजक अधिकारीले बताए।
कार्यक्रमको पूर्वाध सत्रमा जिल्ला प्रशासन कार्यालय कैलालीका सहायक प्रमुख जिल्ला अधिकारी किरण जोशी, भजनी नगरपालिकाका नगर प्रमुख केवल चौधरी, उप–प्रमुख राजु तीरुवा, नेपाल रेडक्रस सोसाइटीका केन्द्रीय प्रतिनिधि तथा विभिन्न सरोकारवालाको उपस्थिति रहेको थियो।
भर्चुअल माध्यममार्फत विभिन्न स्थानमा रहेका समूहसँग समन्वय गर्दै कृत्रिम घटना अभ्यासको तयारी तथा सञ्चालन गरिएको आयोजकले जनाएको छ। नेपाल रेडक्रस सोसाइटी कैलाली जिल्ला शाखाद्वारा सञ्चालित नसर्ने रोग उत्थानशील प्रयोजनका पालिका सहायक तपेन्द्र तिमल्सिनाले स्थानीय तहमा विपद् व्यवस्थापन क्षमताको विकासका लागि यस्तो अभ्यास प्रभावकारी हुने बताए।
नोभो नर्डिस्क फाउण्डेशनको आर्थिक सहयोगमा “रिजिलिएन्स एनसिडी” परियोजनाअन्तर्गत सञ्चालन भइरहेको उक्त कार्यक्रम डेनिस रेडक्रस, क्यानेडियन रेडक्रस, आरहुस विश्वविद्यालय तथा नेपाल रेडक्रस सोसाइटीको सहकार्यमा सञ्चालन गरिएको हो ।
विपद् प्रतिकार्य परियोजना कैलालीका कार्यक्रम अधिकृत मुकेश चन्द्र गौतमका अनुसार “नेपालमा विपद्को अवस्थामा नसर्ने रोग सम्बन्धी अत्यावश्यक प्रतिकार्य प्याकेज (पेन–डी)” को प्रभावकारिता परीक्षण तथा कार्यान्वयन तयारीका लागि २०८३ जेठ १ र २ गते कार्यात्मक कृत्रिम घटना अभ्यास सञ्चालन गरिएको हो।
अभ्यासअन्तर्गत पहिलो घटनामा जल तथा मौसम विज्ञान विभाग ले सार्वजनिक गरेको मनसुन पूर्वानुमानलाई आधार बनाइएको छ। पूर्वानुमानअनुसार यस वर्ष मनसुन अवधिमा सरदरभन्दा बढी वर्षा र तापक्रम वृद्धि हुने सम्भावना रहेकाले सम्भावित विपद्को जोखिमलाई मध्यनजर गर्दै अभ्यास अघि बढाइएको जनाइएको छ।