धनगढी- सुदूरपश्चिम प्रदेशको समग्र विकास, समृद्धि र नीतिगत सुधारका लागि आगामी जेठ २ र ३ गते धनगढीमा ‘सुदूरपश्चिम कचहरी २०८३’ आयोजना हुने भएको छ । ‘समृद्धिका लागि सार्थक संवाद’ भन्ने नारासहित सुदूरपश्चिम प्रदेश नीति तथा योजना आयोग र सुदूरपश्चिम विकास फाउन्डेसन को संयुक्त आयोजनामा कार्यक्रम हुन लागेको हो ।
धनगढीस्थित सौराइ स्क्वायरमा आयोजना हुने कार्यक्रममा सङ्घीय तथा प्रदेश सरकारका प्रतिनिधि, राष्ट्रिय योजना आयोग, नेपाल राष्ट्र बैंक, निजी क्षेत्र, विकास साझेदार संस्था, विज्ञ, युवा तथा अन्य सरोकारवालाहरूको सहभागिता रहने जनाइएको छ ।
सुदूरपश्चिम विकास फाउन्डेसनका अध्यक्ष शेरबहादुर शाही ले कचहरीमार्फत प्रदेशको विकासमा देखिएका चुनौती पहिचान गरी समाधानका लागि पहल गरिने बताए । उनका अनुसार कार्यक्रमपछि तयार गरिने प्रतिवेदनमार्फत सुदूरपश्चिम किन विकासमा पछि परेको भन्ने तथ्य केन्द्र सरकारसमक्ष प्रस्तुत गर्दै आवश्यक दबाब सिर्जना गरिनेछ ।
त्यस्तै, सुदूरपश्चिम प्रदेश नीति तथा योजना आयोगका सदस्य नृप सुनार ले कार्यक्रमले प्रदेशको विकासका लागि स्पष्ट मार्गचित्र तयार गर्न तथा प्रभावकारी नीति निर्माणमा योगदान पुर्याउने विश्वास व्यक्त गरे । कार्यक्रमपछि ‘सुदूरपश्चिम घोषणापत्र’ समेत जारी गरिने उनले जानकारी दिए ।
तथ्याङ्कअनुसार सुदूरपश्चिम प्रदेशमा गरिबी दर ३४.१६ प्रतिशत रहेको छ, जुन देशकै सबैभन्दा बढी हो । प्रदेशमा औद्योगिक विकास न्यून हुनु तथा सङ्घीय बजेटको कम हिस्सा विनियोजन हुने अवस्थाले विकाससम्बन्धी गम्भीर बहस आवश्यक रहेको आयोजकको भनाइ छ ।
कार्यक्रममा पहिलो दिन नीति तथा योजना, दोस्रो दिन निजी क्षेत्र, श्रम र रोजगारी तथा तेस्रो दिन प्रदेशको स्वाभिमान र विकासका प्राथमिकतामाथि गहन छलफल गरिने जनाइएको छ ।
