अत्तरिया- कैलालीको गोदावरी नगरपालिकामा रहेकाे अत्तरिया खानेपानी संस्थाको वैशाख २६ गते हुने निर्वाचनका लागि उम्मेदवारी दर्ता प्रक्रिया सम्पन्न भएको छ । आज वैशाख १४ गते सोमबार संस्थाको नयाँ नेतृत्व चयनका लागि उम्मेदवारी दर्ता आह्वान गरिएको थियो ।
संस्थाको अध्यक्ष पदका लागि एक जना एकल उम्मेदवार र ४ जनाको समूह (प्यानल) सहित उम्मेदवारी दर्ता भएको छ। अध्यक्ष पदमा राजेन्द्र बहादुर खड्का, हर्क बहादुर शाह, गणेश शाह र राज बहादुर खड्का प्यानलसहित चुनावी मैदानमा उत्रिएका छन् भने नन्दराज भट्टले अध्यक्ष पदमा एकल उम्मेदवारी दर्ता गराएका छन् ।
यस संस्थामा प्रत्यक्ष निर्वाचित ११ सदस्य रहने व्यवस्था गरिएको छ। संस्थामा कुल ५,७४२ जना उपभोक्ता मतदाता रहेका छन्।
उम्मेदवारी दर्ता शुल्क अन्तर्गत अध्यक्ष पदका लागि ७,५०० रुपैयाँ, पदाधिकारीका लागि ५,५०० रुपैयाँ र सदस्य पदका उम्मेदवारका लागि ३,५०० रुपैयाँ फिर्ता नहुने गरी तोकिएको छ ।
