कैलाली- सुदूरपश्चिम प्रदेश प्रहरी कार्यालयले आवश्यकता अनुसार प्रहरी नायव निरीक्षक, प्रहरी सहायक निरीक्षक र प्रहरी वरिष्ठ हवल्दारहरूको सरुवा प्रक्रिया अगाडि बढाएको छ। कर्मचारी प्रशासन शाखाले एक सूचना जारी गर्दै विभिन्न दरबन्दीमा कार्यरत उनीहरूलाई नयाँ कार्यक्षेत्रमा खटाएको हो।
सरुवा भएका कर्मचारीहरूले आगामी २०८३ साल वैशाख महिनाको तलब र भत्ता हाल सरुवा भई गएको नयाँ दरबन्दीबाटै खान पाउने गरी व्यवस्था मिलाइएको प्रहरी कार्यालयले जनाएको छ। यस सरुवाको अभिलेख अद्यावधिक गर्नका लागि सङ्घीय मामिला तथा सामान्य प्रशासन मन्त्रालय अन्तर्गतको राष्ट्रिय किताबखाना (प्रहरी), लैनचौरलाई औपचारिक अनुरोध गरिएको छ।
प्रदेश प्रहरी कार्यालयले सरुवा भएका प्रहरी नायव निरीक्षक, प्रहरी सहायक निरीक्षक र प्रहरी वरिष्ठ हवल्दारहरूको विस्तृत विवरणसहितको सूची तयार पारी सम्बन्धित निकायहरूमा पठाएको छ। यसका साथै तालुक कार्यालय र मातहतका अन्य सम्बन्धित कार्यालयहरूलाई समेत आ-आफ्नो अभिलेख किताबमा आवश्यक फेरबदल र कार्यान्वयन गर्न बोधार्थमार्फत निर्देशन दिइएको छ।
