शैक्षिक गुणस्तरमा उल्लेख्य सुधार : नगरप्रमुख बोहरा

कञ्चनपुर- बेदकोट नगरपालिकाका सामुदायिक विद्यालयले पछिल्ला तीन वर्षमा शैक्षिक गुणस्तरमा उल्लेख्य सुधार देखाएका छन् । चार वर्षअघि कक्षा १२ को नतिजा निकै कमजोर थियो, पाँच प्रतिशत मात्रै विद्यार्थी उत्तीर्ण हुन्थे ।

२०७८ सालमा पाँच विद्यालयका ५०९ विद्यार्थीमध्ये केवल २८ जना ‘सी ग्रेड’मा उत्तीर्ण भए, र तीन विद्यालयको नतिजा शून्य थियो।

२०७९ सालपछि नगरपालिकाले अतिरिक्त कक्षा सञ्चालन, आन्तरिक मूल्याङ्कन, साप्ताहिक अभिभावक भेटघाट अनिवार्य बनाउने लगायतका सुधारात्मक कदम चाल्यो। प्रत्येक विद्यालयलाई कक्षा १० र १२ का विद्यार्थीका लागि पाँच लाख रुपैयाँ बजेट पनि विनियोजन गरियो।

परिणाम स्वरूप, २०७९ मा उत्तीर्ण दर १० प्रतिशत, २०८० मा २९.४ प्रतिशत, र २०८१ मा ५१ प्रतिशत पुगेको छ। यस वर्ष ४२१ विद्यार्थीमध्ये २१५ जना उत्तीर्ण भएका छन्।

बैजनाथ माध्यमिक विद्यालयका प्रधानाध्यापक नवराज पन्तले भने, “अभिभावक भेटघाट र अतिरिक्त कक्षाले कमजोर विद्यार्थीमा सुधार ल्याएको छ।” नगरप्रमुख भोजराज बोहराले पनि तीन वर्षमा शैक्षिक गुणस्तरमा उल्लेख्य सुधार भएको बताए।