धनगढी- नाइरोबी फ्लाई किराका कारण कैलालीका स्थानीयमा छालासम्बन्धी समस्या बढेको छ । बर्खायाम लागेसँगै छालामा संक्रमण (एलर्जी) हुने समस्या बढ्दो रूपमा देखिएको हो ।
नाइरोबी फ्लाई नामक किराका कारण सङ्क्रमण भइरहेको चिकित्सकले बताएका छन् । मानिसको शरीरमा पेडेरिन रसायन छाडेपछि छालामा जलन हुने, चिलाउने, छाला रातो हुने जनैखटिरा जस्तै खटिरा देखिने समस्या हुने गरेको जनाइएको छ ।
१२ देखि ३६ घण्टापश्चात् उक्त घाउबाट तरल पदार्थ चुहिने जस्ता लक्षण समेत देखा पर्ने गरेको चिकित्सकको भनाइ छ । केही दिनयता नाइरोबी फ्लाई किराका कारण छालामा सङ्क्रमण बढ्दो रूपमा देखिएको स्किन केयर एन्ड एस्थेटिक सेन्टर प्रालिमा कार्यरत डा. सुमन सुवेदीले बताए ।
“अहिले नाइरोबी फ्लाई किराका कारण समस्या भएर उपचारका लागि आउने बिरामीको सङ्ख्या बढ्दो छ । यो किराका कारण छालामा भएको सङ्क्रमण सामान्यतया एक देखि दुई हप्ता भित्र निको हुने जनाइएको छ । नाइरोबी फ्लाई किराका कारण भएको घाउ धेरै चिलाउने गरेको धनगढीकी पूजा चौधरीले बताईन ।
के हो नाइरोबी फ्लाई
नाइरोबी फ्लाई सुन्तला र कालो रङको एक प्रकारको किरा हो । यो सामान्यतया पानी परेपश्चात् वा बढी आद्रता भएको स्थानमा पाइने गर्छ । यो किराले मानिसलाई टोक्दैन तर सम्पर्कमा आएपश्चात् नाइरोबी फ्लाईले निकाल्ने एक प्रकारको अम्लले छालामा एलर्जी गराउने गरेको बताइएको छ ।
जोगिने उपाय
नाइरोबी फ्लाई किराको सम्पर्कबाट बच्नका लागि राति झुल टाँगी चम्किलो बत्ती निभाएर सुत्न आग्रह गरिएको छ । चम्किलो बत्तीले अन्य किरालाई जस्तै नाइरोबी फ्लाईलाई पनि आकर्षित गर्ने भएका कारण चम्किलो बत्तीमुनि बस्न नहुने बताइएको छ ।
त्यस्तै बाहिरको चम्किलो बत्ती पनि कम गर्न र लामो बाहुला भएको लुगा, पाइन्ट लगाउन आग्रह गरिएको छ । छालामा नाइरोबी फ्लाई किरा बसेमा त्यसलाई नमाडी हल्कासँग फुकेर भगाउन सकिने धनगढी उपमहानगरपालिकाको स्वास्थ्य शाखाले जानकारी दिएको छ ।