अत्तरिया- कैलालीको गोदावरी नगरपालिकाको अत्तरिया बजार क्षेत्रमा केही दिन यता नगरपालिकाद्वारा निरन्तर अनुगमनमा लागेको छ । पछिल्लो समयमा यस पालिका भित्र रहेका पसलहरूलाई व्यवस्थित बनाउन र करको दायरामा ल्याउन सुझाव सहित अनुगमनमा लागेको छ ।
गोदावरी नगरपालिकाको वडा नम्बर २ स्थित अत्तरिया बजारको महेन्द्रनगर लाइनमा अनुगमन गरिएको हो । बजारमा पसल दर्ता र नवीकरण गरिएको नगरिएको बारेमा अनुगमन गरिएको नगरपालिकाको राजश्व शाखा प्रमुख खगेन्द्र चौधरीले बताएका छन । नगरपालिकाले जेठ ७ गते सोमबार देखि अत्तरिया बजारमा अनुगमन सुरु गरेको थियो ।
अनुगमनका क्रममा कतिपयले भर्खरै पसल सञ्चालन गरेको बताएका छन् भने कतिपयले छोटो समयको लागि गुजाराको लागि मात्रै पसल सञ्चालन गरेकोले दर्ताको प्रक्रियामा नगएको व्यापारी नयन बिष्टले बताएका छन् । राजश्व कार्यालय, घरेलु उद्योग लगायतमा दर्ता गरे सँगै सम्बन्धित वडामा पनि अनिवार्य रुपमा हरेक व्यवसाय दर्ता, नवीकरण गराउनु पर्ने भन्दै नगरपालिकाले अनुगमन सुरु गरेको हो । जेठ ७ गते देखी अनुगमन सुरु गरेको नगरपालिकाले आइतबार वडा नम्बर १ को बजार क्षेत्रको अनुगमन सकाएर आइतबार देखि नै वडा न. २ को महेन्द्रनगर लाईनको बजार क्षेत्रमा अनुगमन गरेको छ ।
अनुगमनका क्रममा अधिकांश भन्दा बढी पसलहरू वडामा दर्ता नभएको पाइएको राजश्व शाखा प्रमुख चौधरीले बताएका छन । दर्ता नभएकाहरूको विवरण लिएर आगामी दिनमा के कसरी अगाडि बढ्ने भन्ने बारेमा निर्णय गरिने वडा नम्बर २ का वडा अध्यक्ष यज्ञ बहादुर महाराले बताए ।
अनुगमनका क्रममा व्यवसायीले दिएका सुझावहरू माथि पनि छलफल बाट निर्णय हुने पालिका प्रतिनिधिले बताए । विविध कारणले समयमै अनुगमन हुन नसक्दा ठुलो सङ्ख्यामा व्यवसायीहरू करको दायरा भन्दा बाहिर रहेको उनको भनाई छ । अनुगमन टोलीले व्यवसाय दर्ता, नवीकरण खाद्य सामग्रीहरूको म्याद लगायतका कुराहरू हेरिरहेको छ । करको दायरामा ठुलो संख्या रहेकोले तथ्यांक संकलन गरि नगरपालिकामा पेश गर्ने जानकारी पशु सेवा प्राविधिक टेक बहादुर शाहुले बताए ।
अनुगमनमा वडामा दर्ता गर्नेबारे जानकारी गराइएको र अर्को पटकको अनुगमनमा पनि दर्ता नगरेको पाइएमा कारबाहीको प्रक्रियामा जाने नगरपालिकाको भनाई छ । दर्ता गरेका व्यवसायी मध्य पनि अधिकांशले दुई तीन वर्ष यता नवीकरण गरेका छैनन् ।
अनुगमन टोलीकी संयोजक गोदावरी नगरपालिकाकी उप प्रमुख शारदा देवी रोकायाले अनुगमनका क्रममा ठुलो सङ्ख्यामा व्यवसायीहरू करको दायरा भन्दा बाहिरै रहेको पाइएको बताइन् । उनले करको दर भन्दा पनि दायरा बढाउने उद्देश्यले व्यवसायको दर्ता र नवीकरणको अनुगमन गरिरहेको बताइन् ।
