कञ्चनपुर- नेपाली कांग्रेसका नेता तथा प्रतिनिधिसभा सदस्य एनपी साउद परराष्ट्रमन्त्री पदमा नियुक्त भएपछि पहिलोपटक गृहजिल्ला कञ्चनपुर आउँदै छन्।
मन्त्री साउद काठमाडौँबाट आज (शनिबार) बिहानको जहाजमा धनगढी आउँदै छन्। नेपाली कांग्रेसका जिल्ला सचिव भीम भट्टका अनुसार मन्त्री साउदले आफ्नो निर्वाचन क्षेत्रअन्तर्गत कृष्णपुर नगरपालिकाको मालुमेलामा आयोजित ग्वासी समैजी समितिको साधारणसभालाई सम्बोधन गर्नेछन्।
मन्त्री साउद गत मंसिरमा सम्पन्न प्रतिनिधिसभा निर्वाचनमा कञ्चनपुर क्षेत्र नं। २ बाट निर्वाचित हुन्। मन्त्रीमा नियुक्त भएपछि गृहजिल्ला आउन लागेका साउदले पहिलो कार्यक्रम पनि आफ्नै निर्वाचन क्षेत्रमा राखेका हुन्।
साधारणसभा सम्पन्न भएपछि उनी महेन्द्रनगरस्थित कांग्रेस पार्टी कार्यालयमा आउने छन्। सचिव भट्टका अनुसार पार्टी कार्यालयमा दिउँसो ३ बजे स्वागत तथा बधाई कार्यक्रम आयोजना गरिनेछ।
‘मन्त्री भएपछि उहाँ पहिलोपटक गृह जिल्ला आउँदै हुनुहुन्छ’, भट्टले भने, ‘पार्टीका तर्फबाट स्वागत र बधाई कार्यक्रम राखेका छौँ।’
साँझ महेन्द्रनगरमै बास बसेर साउदले आइतबार बिहान शुक्लाफाँटाको झलारीमा आफ्नो निर्वाचन क्षेत्रका अगुवा कार्यकर्तासँग भेट गर्ने कार्यक्रम छ।
सोही दिन अढाई बजे धनगढीमा कैलालीका कांग्रेस कार्यकर्तासँग भेटघाट गरी राजधानी फर्किने छन्। साउद ३ वैशाखमा परराष्ट्रमन्त्री पदमा नियुक्त भएका हुन्। उनी यसअघि २०७० मा सिँचाइमन्त्री र २०५६ मा शिक्षा राज्यमन्त्री बनेका थिए।
