धनगढी, २२ चैत– धनगढी उपमहानगरपालिका भित्रका बालबालिकाहरूलाई भोली (बुधबार) चैत्र २३ गतेदेखि टाइफाइड विरुद्धको खोप लगाइने भएको छ ।
उपमहानगरपालिकाको स्वास्थ्य शाखाले मङ्गलवार टाइफाइड विरुद्धको खोप अभियानलाई लक्षित गरी अभिमुखीकरण कार्यक्रमको आयोजना गर्दै १५ महिनादेखि १५ वर्ष उमेरसम्मका बालबालिकालाई टाइफाइडविरुद्धको खोप अभियान हुन लागेको जानकारी दिएको हो ।
उपमहानगरपालिकाका स्वास्थ्य शाखा प्रमुख अधिकृत कृष्ण बोहराले उपमहानगरपालिकाका विद्यालयमा टाइफाइड विरुद्धको खोप अभियान चैत्र २३ गतेदेखि वैशाख २ गतेसम्म सञ्चालन हुने बताए । उपमहानगरपालिकाले करिब ५७ हजार सात सय ८२ जना बालबालिकालाई टाइफाइड विरुद्धको खोप लगाउने लक्ष्य राखेको छ ।
देशभर यो कार्यक्रम २५ गतेदेखि लागु हुने भएपनी धनगढीका अधिकांश विद्यालयले परीक्षाको मिति तोकिसकेकाले २३ गतेदेखि नै सञ्चालन गर्न लागिएको उनले बताए । उपमहानगरपालिका भित्र १३२ खोप केन्द्र र १४१ खोप सेसन संख्या रहने र ३३० महिला स्वास्थ्य संयमसेविका र ८६ स्वास्थ्यकर्मी परिचालन गरिने जनाएको छ ।