धनगढी, १२ चैत– सुदूरपश्चिम प्रदेशको अस्थायी राजधानी कैलालीकाे धनगढीमा ‘देवभूमि सुन्दर ठाउँ, सुदूरपश्चिम घुम्न जाउँ’ भन्ने मूल नारासहित तीन दिने ‘फारवेष्ट ट्राभल मार्ट-२०२२’ आयोजना हुने भएको छ ।
सुदूरपश्चिम प्रदेशका पर्यटकीय गन्तव्य स्थलहरुलाई देश तथा विदेशका सम्भावित बजारहरुमा प्रचारप्रसार गरी पर्यटकीय गतिविधिलाई ग्रामीण स्तरसम्म बढाउदै रोजगारी सृजना, आयआर्जनमा वृद्धि गर्दै पर्यटन मार्फत प्रदेशलाई समृद्ध बनाउने उद्देश्यले कार्यक्रमको आयोजना गरिन लागेको हो ।
नेपाल पर्यटन वोर्ड, धनगढी उपमहानगरपालिका र नाटा सुदूरपश्चिम प्रदेशको सहकार्यमा ‘फारेवेष्ट ट्राभल मार्ट-२०२२’ आयोजना हुन लागेको संयोजक माया प्रकाश भट्टले बताए ।
चैत २५ गतेदेखि २७ गतेसम्म आयोजना हुने ‘फारवेष्ट ट्राभल मार्ट-२०२२’ मा सार्क राष्ट्रका राजदूत, नेपाल सरकारका विशिष्ट अधिकृत, राष्ट्रिय तथा अन्तराष्ट्रियस्तरमा टूर प्याकेज बिक्री गर्ने पर्यटन व्यवसायीहरुलाई सहभागिताका लागि निमन्त्रण गरिएको संयोजक माया प्रकाश भट्टले बताए ।
‘मार्टमा करिब तीन सय स्वदेशी तथा विदेशीको सहभागिता रहन्छ’ संयोजक माया प्रकाश भट्टले भने, ‘होटेल एवम् पर्यटन व्यवसायी, टूर अपरेटर तथा गाईडहरुलाई विजनेश टू विजनेश कार्यक्रमसहित प्रदेशका प्रमुख पर्यटकीय स्थलहरुको अवलोकन भ्रमण गराउने कार्यक्रम तय भएको छ ।’
कार्यक्रमको पहिलो दिन धनगढीमा प्रभातफेरीसहित वि टू वि सम्मेलन हुनेछ भने दोश्रो तीन टोली बनाई प्रदेशका पर्यटकीय गन्तव्य भ्रमण कार्यक्रम रहेको संयोजक भट्टले बताए । ‘एक टोली धनगढी उपमहानगर भित्रका पर्यटकीयस्थलको अवलोकन गर्नेछन् भने दोश्रो कर्णालीमा र्याफ्टिङ गर्नेछन् भने तेश्रो टोली पहाडको बुडरसम्म पुग्नेछन्’ संयोजक भट्टले भने, ‘तेश्रो दिन गोदावरीमा वृहत कार्यक्रम सहित समापन गरिनेछ ।’
कार्यक्रमलाई सभ्य, भव्य र उपलब्धि मुलक बनाउन विभिन्न समिति गठन गरिएको छ । अनुगमन, मूल्यांकन र प्रतिवेदन समितिको संयोजक डाक्टर हेमराज पन्त, सचिवालय व्यवस्थापन संयोजक कलम बम, समारोह स्थल व्यवस्थापन संयोजक पदमबिक्रम सिंह, अतिथी सत्कार संयोजक जगदीशचन्द भट्ट, अतिथी आमन्त्रण संयोजकमा परमानन्द भण्डारी, सास्कृतिक समितिको संयोजक पुष्करराज भट्ट, प्रचारप्रसार संयोजक भिम चौधरी र अर्थ व्यवस्थापन संयोजक धनञ्जय जोशीलाई तोकिएको छ । उक्त कार्यक्रमका लागि ५५ लाख बढी रकम आवश्यक पर्ने बताइएको छ ।
