दार्चुला, ११ फागुन– नेपालस्थित अमेरिकी राजदूतावासले दार्चुलामा रहेको सशस्त्र प्रहरीको ४४ नम्बर गणलाई प्राकृतिक प्रकोप नियन्त्रणमा सहयोगी हुने दुई कन्टेनर राहत सामाग्री प्रदान गरेको छ ।
सशस्त्रको मुख्यालय हलचोक हुँदै ती सामाग्री २० दिन अघि दार्चुला सदरमुकाम खलंगा पुगेका हुन् । गणका सशस्त्र प्रहरी प्रमुख एसपी त्रिभुवन बिष्टले राहत सामाग्री वुझेको बताए । ‘हेडक्वाटरमा रहेको हाम्रो डिजाष्टर यूनिट मार्फत ती सामाग्री यहाँ पुगेका हुन्,’ उनले भने, ‘त्यसमा प्रकोपमा काम लाग्ने स्वास्थ्य सामाग्रीहरु रहेका छन् ।’
कन्टेनरमा मास्क, कम्बल, ग्यास सिलिन्डर, ग्लोब्स र औषधीका कीटहरु रहेका छन् । ती कन्टेनर डिभिजन वन कार्यालय परिसर दार्चुलामा राखिएका छन् । अचानक कुनै दैबि प्रकोप आएको खण्डमा तत्कालका लागि यी स्वास्थ्य सामाग्री सहयोगी हुन सक्ने एसपी बिष्टले बताए ।
