अत्तरिया, ३ असाेज– पूर्वपश्चिम राजमार्गको चिसापानीदेखि गड्डाचौकी र अत्तरियादेखि त्रिनगर सीमानाकासम्म जडान गरिएका सिसीटिभी क्यामेरा प्रहरीलाई हस्तान्तरण गरिएको छ ।
सुदूरपश्चिम प्रदेश आन्तरिक मामिला तथा कानून मन्त्रालयले राजमार्गका १ सय ३८ स्थानमा जडान गरेका सिसीटिभि क्यामेरा सुदूरपश्चिम प्रदेश प्रहरी कार्यालयलाई हस्तारन्तरण गरिएका हुन ।
आइतबार अत्तरियामा रहेको इलाका प्रहरी कार्यालय मालाखेतीमा आयोजित एक औपचारीका कार्यक्रमका बिच आन्तरिक मामिला तथा कानून मन्त्री पूर्णा जोशीले प्रदेश प्रहरी कार्यालय प्रमुख पुरुषोत्तम कंडेललाई हस्तान्तरण गरेकी हुन् ।
हस्तान्तरण कार्यक्रममा बोल्दै मन्त्री जोशीले प्रदेश सरकार अपराध तथा दुर्घटना न्यूनिकरण अभियान अन्तरगत क्यामेरा जडान गरिएको बताइन् ।
उनले प्रहरीलाई स्रोत साधन सम्पन्न बनाउनको लागि प्रदेश सरकारको आर्थिक बर्ष २०७७/०७८ को कार्यक्रम अन्तरगत १ सय ३८ स्थानमा क्यामेरा जडान गरिएको बताईन् । आगामी आउँदा दिनहरूमा तराईका मुख्य बजार र अपराध हुने ठाउँ लगायत पहाडका बिभिन्न सहरहरुमा चालु आर्थिक बर्षमा पनि कार्यक्रम बिस्तार गरिने कानून मन्त्री जाेशीले बताइन ।
उनले क्यामेरा प्रहरीलाई हस्तान्तरण गरिएपनि कुनै क्यामेरामा समस्या आएमा प्रदेश सरकाले मर्मत गर्ने समेत बताइन् ।
सोही कार्यक्रममा मन्त्री जोशीले अत्तरियामा जडान गरिएको मोनिटरको उद्घाटन समेत गरेकी थिईन ।
कार्यक्रममा बोल्दै आन्तरिक मामिला तथा कानून मन्त्रालयका सचिव चूडामणी पौडेलले क्यामेरा जडानका लागि २ करोड विनियोजन गरिएको भएपनि ठेक्का प्रक्रियामा जाँदा १ करोड ७१ लाख ३१ हजार २ सय ५२ रुपैयाँमा क्यामेरा जडान गरिएको बताए ।
उनले जडान भएका सिसीटिभी क्यामेरा मध्ये फिक्स सिसीटिभी क्यामेरा १ सय ३१ वटा र घुम्ने क्यामेरा ७ जडान गरिएको बताए । क्यामेरा जडानका लागि १ सय ८ किलोमीटर फाईबर जडान गरिएको छ । जसमा नेपाल विद्युत प्राबिधिकरणका सहित गरेर ९० वटा पोल प्रयोग भएका छन । सिसीटिभी क्यामेराको मनिटरिङका लागि १२ स्थानमा स्टेसन राखिएका छन । त्यसमध्येको महत्तपूर्ण स्टेसन अत्तरियाको रहेकाे हो ।
उनले केही ठाउँमा स्थानिय सरकारले पनि सिसीटिभी क्यामेरा जडान गरेकाले आगमी दिनमा दुवै निकायको समन्वयमा यसलाई अगाडी बढाउनु पर्ने बताए । उनले जडान गरिएका सिसीटिभी क्यामेरा बत्ती गएको समयमा काम नगर्ने भएकाले क्यामेराको पावर ब्याकअपका लागि स्थानिय सरकारको पनि सहयोगको आवश्यक रहेको बताए ।
प्रदेश प्रहरी कार्यालय प्रमुख कंडेलले सिसीटिभी क्यामेरा जडानपछि प्रदेश प्रहरीको काम प्रभावकारी हुने बताए । उनले प्रहरी प्रविधि सम्पन्न हुँदै गएपछि मात्रै प्रहरीको कार्यक्षमता अभिवृद्धि र न्यायमा जनताको पहुच बढ्ने बताए ।
कार्यक्रममा बोल्दै गोदावरी नगरपालिकाकी उपप्रमुख रत्ना कडायतले गोदावरी भित्र जडान भएका सिसीटिभी क्यामेराको नगरपालिकाले अपनोत्व लिने बताएकी छिन् ।
