धनगढी- कैलालीको धनगढीमा लालसलाम कप-२०८१ क्याम्पस स्तरीय पुरुष भलिबल प्रतियोगिता हुने भएको छ । अनेरास्ववियु (क्रान्तिकारी) कैलाली जिल्ला समितिको आयोजनामा उक्त भलिबल प्रतियोगिता हुन लागेको हो ।
आयोजकले बुधबार धनगढीमा पत्रकार सम्मेलन गर्दै आगामी बैशाख १५ गते देखि प्रतियोगिता हुने जानकारी गराएको छ । प्रतियोगितामा प्रदेशभरिका ३० टिमको सहभागिता रहने अनेरास्ववियु (क्रान्तिकारी) कैलालीका अध्यक्ष शिवराज सञ्ज्यालले जानकारी दिए ।
प्रतियोगितामा प्रथम हुने टिमलाई १ लाख २५ हजार रुपैयाँ, द्वितीयलाई ८१ हजार रुपैयाँ र तृतीयलाई ५१ हजार रुपैयाँ एवं ट्रफि, मेडल र प्रमाणपत्र प्रदान गरिने उनले बताए । खेल भलिबल संघको नियम अनुसार खेलाइने, टिम दर्ता गर्दा खेलाडीको नाम अनिवार्य दिनु पर्ने, ९ जना खेलाडी लगायत १ जना प्रशिक्षक र एक जना व्यवस्थापक गरि ११ जना हुनु पर्ने तथा खेलाडी सम्बन्धित क्याम्पसमा अध्ययनरत रहेको प्रमाण पत्र पेश गर्नु पर्ने आयोजकले जनाएको छ ।
टिम दर्ता समय आगामी बैशाख १ गते देखि १४ गते सम्म रहने तथा दर्ता शुल्क ७ हजार रुपैयाँ रहेको आयोजकले जनाएको छ । प्रतियोगिता आगामी बैशाख २२ गते सम्म धनगढी रंगशालामा हुने जनाइएको छ ।