काठमाडौं, २९ जेठ– सामाजिक अभियान्ता ज्ञानेन्द्र शाही सहित उनका टीम माथि सुर्खेतमा सांघातिक आक्रमण भएको छ । कोरोना महामारीका बेला अक्सिजन सिलेन्डर वितरण गर्दै सुर्खेत आउने क्रममा शाही माथि सांघातिक आक्रमणमा परेका हुन्।
ज्ञानेन्द्र सहित उनका ड्राइभर टीमका अन्य व्यक्तिहरु माथि एमालेका कार्यकर्ताले फलामकाे रड र बाँसकाे भाँटाहरुले आक्रमण गरेका हुन् । अभियान्ता शाहीले प्रहरी, प्रशासनले सहयोग गर्नुको सट्टा उल्टो आक्रमण गर्न खोजेको आरोप लगाएका छन् । शाहीले आफूसहित राजेश महत, कृष्ण पान्डे, तिलक बस्नेत, नितु खड्का, लोक बहादुर रोकाय, शान्त शर्मा, सीता आचार्य, महेश बीसी र खगेन्द्र बजगाईंमाथि आक्रमण भएको बताएका छन् ।
नेकपा एमाले केपी शर्मा ओली निकटका कार्यकताले आक्रमण गरेको शाहीले बताएका छन् । आफू मकैबारीमा लुकेर ज्यान बचाउन सफल भएको बताएका छन् । उनले सुर्खेतको डिएसीले समेत असहयोग गरेको आरोप लगाए । प्रहरीलाई मेरा मान्छेहरुलाई मर्ने गरि घाइते बनाएको छ । अस्पताल सम्म भए पनि पुर्याइदिनु भनेर हारगुहार गर्दा समेत नाम के हो ? ठेगाना के हो ? भन्दै बसेको र सहयोग नगरेको आरोप लगाए ।
जसरी पनि हामीलाई मार्ने नियतका साथ गाडी चलाउँदा अघि बढ्ने क्रममा ढुंगा मुढा तेस्राएर अवरोध गरेको बताए । साथै प्रहरीकै अगाडि यी मान्छेहरुले हामी माथि आक्रमण गरेको हो भन्दा समेत उनीहरुलाई त्यहाँबाट भगाएको आरोप लगाएका छन् । मध्यरातीमा आक्रमण भएर लडिरहेका शाहीले अभियान्ता हेमराज थापा सहितको टोलीले उद्धार गरि प्रदेश अस्पतालमा भर्ना गरेका हुन् । प्रहरीले घटनामा संग्लग्न पाँच जनालाई समेत पक्राउ गरेको छ ।
