अत्तरिया- कैलालीको गोदावरी नदीमा आएको बाढीका कारण बीच नदीमा फसेका एक जनाको प्रहरीले सकुशल उद्धार गरेको छ ।
आइतबार बर्दगोरिया गाउँपालिका–१ निवासी ३३ वर्षीय अपिल मल्ल नदीको बीचभागमा फसेका थिए । सूचना प्राप्त हुनासाथ इलाका प्रहरी कार्यालय मालाखेतीबाट खटिएको प्रहरी टोलीले उद्धार अभियान सञ्चालन गरी मल्ललाई सुरक्षित रूपमा बाहिर निकालेको हो ।
इलाका प्रहरी कार्यालय मालाखेतीका डिएसपी हिरा सिंह महराका अनुसार समयमै प्रहरी टोली परिचालन गरिएकाले मल्लको सकुशल उद्धार गर्न सफल भएको हो ।
मनसुन सक्रिय भएसँगै नदी तथा खोलाहरूमा पानीको बहाव बढिरहेको भन्दै प्रहरीले सर्वसाधारणलाई आवश्यक सावधानी अपनाउन तथा बाढी आएको अवस्थामा नदी तर्न वा नदी किनारमा अनावश्यक रूपमा नजान आग्रह गरेको छ ।
