अछाम- रामारोशन गाउँपालिका अध्यक्षले आफ्नै श्रीमतीलाई थप अधिकारसहित भान्छे नियुक्ति गरेको समाचार बाहिरिएपछि भान्छेबाट राजीनामा दिएका छन् । जनस्तरमा व्यापक आलोचना भएको भन्दै गाउँपालिकाले अध्यक्षकी श्रीमती जयसरा साउँदको राजीनामासँगै उनले बुझेको ३१ हजार ६३० रुपियाँ गाउँपालिकाको सञ्चित कोषमा जम्मा भएको प्रमुख प्रशासकीय अधिकृत रामबहादुर भण्डारीले जानकारी दिए । जेठको आधा र असार महिनाको गरेर डेढ महिनाको रकम फिर्ता गरिएको बताइएको छ।
गाउँपालिका अध्यक्ष मानबहादुर साउदले आफू विजयी हुनेबित्तिकै श्रीमती जयसरालाई भान्छेसँगै आफू गएको ठाउँमा जाने र भत्ता पाउने गरी नियुक्त गराएका थिए । राजीनामा स्वीकृतिसँगै भान्छे पदसँग गरिएको सम्झौतासमेत रद्द भएको बताइएको छ। श्रीमतीलाई भान्छे नियुक्तिको सूचना बाहिरिएपछि अधिकांशले शक्तिको दुरुपयोग गरेर आफ्नी श्रीमतीलाई भान्छे नियुक्त गरेको भन्दै कडा विरोध गरेका थिए।
