अत्तरिया- सुदूरपश्चिममा पछिल्लो समय बैंकिङ कसुरका घटनामा तीव्र वृद्धि भएको छ । आर्थिक वर्ष २०८१/०८२ मा मात्र बैंकिङ अपराधसम्बन्धी ४४३ मुद्दा प्रहरीमा दर्ता भएका छन्।
प्रहरी वरिष्ठ उपरीक्षक विश्व अधिकारीका अनुसार बैंक तथा वित्तीय क्षेत्रसँग सम्बन्धित अपराध एकपछि अर्को बढ्दै गएका छन् ।
विद्यमान कानुनअनुसार अनधिकृत रुपमा खाता खोल्ने वा रकम भुक्तानी गर्ने, चेक तथा खाताको विवरण अरूलाई दिने, धितोको अस्वाभाविक मूल्यांकन गरी ऋण लिने वा दिने जस्ता गतिविधि ‘बैंकिङ कसुर’ भित्र पर्दछन् । नेपालमा यससम्बन्धी कानूनी व्यवस्था ‘बैंकिङ कसुर तथा सजाय ऐन, २०६४’ मा उल्लेख गरिएको छ ।
कानुनले चेक बाउन्सको हकमा जारी मितिले ६ महिनाभित्र उजुरी दिनुपर्ने प्रावधान गरेको छ । यस्तै, कसुर थाहा पाएको एक वर्षभित्र जाहेरी दिन सकिने र जाहेरी परेको मितिले ६ महिनाभित्र मुद्दा दर्ता गर्नुपर्ने व्यवस्था छ ।
बैंक तथा वित्तीय संस्थाका कर्मचारी वा पदाधिकारीका हकमा भने जहिलेसुकै मुद्दा चलाउन सकिने व्यवस्था छ । बैंकिङ कसुरमा संलग्न व्यक्तिलाई बढीमा ६० दिनसम्म थुनामा राखेर अनुसन्धान गर्न सकिने कानुनी प्रावधान छ ।
