अत्तरिया- अत्तरियास्थित सत्यवती एकेडेमीले आफ्नो समर्पित शैक्षिक प्रयासमार्फत स्थानीय क्षेत्रमा उदाहरणीय सफलता प्राप्त गर्दै आइरहेको छ ।
हालै सम्पन्न आधारभूत तह २०८१ मा कक्षा ८ का विद्यार्थीहरूले ९७.४% पास दर हासिल गर्दै विद्यालयको शैक्षिक धरातललाई अझ बलियो बनाएका छन् । दुई जना विद्यार्थीले पूर्ण ४.० GPA ल्याएर उत्कृष्ट प्रदर्शन गरेका छन् भने अन्य धेरैले पनि उच्च अंक प्राप्त गर्दै विद्यालयको नाम उजागर गरेका छन् ।
विद्यालयका संचालक बिर बहादुर कडायत र प्रिन्सिपल यसोदा ध्याडी कडायतले विद्यार्थीहरूको निरन्तर मेहनत, शिक्षकहरूको समर्पण र अभिभावकहरूको सहयोगको उच्च मूल्याङ्कन गर्दै यस सफलताको श्रेय सम्पूर्ण सत्यवती परिवारलाई दिएका छन् । उहाँहरूले भन्नुभयो, “हाम्रो उद्देश्य केवल परीक्षा पास गराउने नभई विद्यार्थीको समग्र व्यक्तित्व विकास गर्दै भविष्यको प्रतिस्पर्धी संसारका लागि तयार पार्नु हो । गुणस्तरीय शिक्षा हाम्रो पहिलो प्राथमिकता हो ।”
सत्यवती एकेडेमीले सुरुदेखि नै आधुनिक शिक्षण पद्धति, अनुभवी शिक्षकहरू, प्रविधिमैत्री कक्षाहरू र अनुशासित वातावरण मार्फत शिक्षालाई प्रभावकारी बनाउने कार्य गर्दै आएको छ । विद्यालयले विद्यार्थीहरूलाई सिर्जनशील, आत्मनिर्भर र जिम्मेवार नागरिक बनाउने दिशामा केन्द्रित प्रयास गरिरहेको छ ।
शिक्षा मात्र होइन, नैतिकता, नेतृत्व क्षमता र सामाजिक चेतनाको विकासमा समेत विद्यालयले जोड दिएको छ । यही प्रतिबद्धता र दूरदृष्टिले सत्यवती एकेडेमीले अत्तरियामा शैक्षिक नेतृत्वको उदाहरण प्रस्तुत गर्न सफल भएको हो ।
विद्यालय परिवारले आगामी दिनहरूमा झनै उत्कृष्ट परिणाम ल्याउने र राष्ट्रियस्तरमै शैक्षिक पहिचान बनाउने लक्ष्य लिएको छ । सत्यवती एकेडेमीको यो यात्रा अत्तरियाको गौरव बन्ने विश्वास गरिएको छ ।