अत्तरिया- सुदूरपश्चिम प्रदेश सरकारले २०८२ असोज १ र २ गते गर्ने लगानी तथा विकास सम्मलेनको पूर्व तयारीका लागि चैत्र २७ गते पूर्व लगानी तयारी सम्मेलनको तयारीलाई तिव्रता दिएको छ ।
सोमबार सुदूरपश्चिम प्रदेशका मुख्यमन्त्री तथा लगानी तथा विकास सम्मेलनका निर्देशक समितिका संयोजक कमल बहादुर शाहको अध्यक्षतामा बसेको बैठकमा सरकारमा सहभागी मन्त्रीहरू, राज्यमन्त्रीहरू, पूर्व मुख्यमन्त्री, प्रदेश नीति तथा योजना आयोगका सदस्यहरू सहित मन्त्रालयका सचिवहरूको उपस्थिति रहेको थियो ।
फाल्गुन २१ सुदूरपश्चिम प्रदेश सरकारको मन्त्रिपरिषद्स्तरिय निर्णयले २०८२ असोज १ र २ गते गर्ने लगानी तथा विकास सम्मलेन धनगढीमा गर्ने निर्णय गरेको थियो । सम्मेलनलाई सफल बनाउनका निमित्त पूर्व लगानी तयारी सम्मेलन गर्न लागिएको हो ।
आत्मनिर्भर अर्थतन्त्र निर्माणको लागि स्वदेशी तथा विदेशी लगानीलाई आकर्षित गरी लगानीमैत्री वातावरण सिर्जना गर्न आवश्यक नीतिगत, कानुनी र कार्यक्रम व्यवस्था गर्न, नीतिगत, कानुनी र संरचनागत सुधार गरी सार्वजनिक–निजी सहकार्यलाई प्रोत्साहन गरिने लगायतका यस सम्मेलनको उद्देश्य रहेको बैठकमा मुख्यमन्त्री शाहले जानकारी दिए ।
“सुदूरपश्चिम प्रदेश नेपालको एक समृद्ध आर्थिक सम्भावना बोकेको क्षेत्र भए तापनि औद्योगिक पूर्वाधारको अभाव, सीमित लगानी तथा दीर्घकालीन विकास परियोजनाको कमीका कारण यहाँको आर्थिक वृद्धिदर अपेक्षित रुपमा हुन नसकेकोले रोजगारीका अवसर सिर्जना गर्न चुनौती देखिएको छ ।” मुख्यमन्त्री शाहले भने “प्रदेशको समग्र आर्थिक गतिविधिलाई गति दिनका लागि सुदूरपश्चिम प्रदेश लगानी तथा विकास सम्मेलन आयोजना गर्नु अपरिहार्य छ ।”
सम्मेलन सफलतापूर्वक सम्पन्न गर्नका निमित्त मुख्यमन्त्री कमल बहादुर शाहको संयोजकत्वमा मूल आयोजक समिति, पराराष्ट्र मन्त्री डा. आरजु राणा देउवाको संयोजकत्वमा सल्लाहकार समिति, मुख्यमन्त्री कमल बहादुर शाहको संयोजकत्वमा मूल निर्देशक समिति, पूर्व मुख्यमन्त्री राजेन्द्र सिंह रावलको संयोजकत्वमा समन्वय तथा सहजीकरण समिति, आर्थिक मामिला मन्त्री बहादुर सिंह थापाको संयोजकत्वमा कार्यकारी समिति गठन गरिएको छ ।