बैतडी- बैतडीमा कपडा सुकाउने क्रममा करेन्ट लागेर एक महिलाको मृत्यु भएको छ । पाटन नगरपालिका–६ डुङग्राकी ५७ वर्षीया जानकी लुहारको सोमवार मृत्यु भएको हो ।
आफ्नै घर नजिक बिद्युतको पोलबाट मिटर बक्समा ल्याएको तार खुल्ला भई करेन्ट प्रभाव भएको ग्याबिङ जालीमा कपडा सुकाउने क्रममा करेन्ट लागेर जानकी गम्भिर घाइते भएकी थिइन् ।
उनको उपचारको लागि स्थानीय मेडिकल लगिएकोमा उपचारको क्रममा मृत्यु भएको जिल्ला प्रहरी कार्यालय बैतडीका प्रहरी निरीक्षक खेम विक्रम केसीले बताए ।
साथै जानकीलाई लागेको करेन्ट छुटाउने क्रममा सोही ठाउँ बस्ने ३८ वर्षीया कलावती ओड, १२ वर्षीया पबित्रा ओड, १० वर्षीया भवनेश्वरी ओड र २२ वर्षीया सिता लुहार घाइते भएका छन् । उनीहरुको स्वास्थ्य अवस्था समान्य रहेको प्रहरी निरीक्षक केसीले जानकारी दिए । घटनाका बिषयमा थप अनुसन्धान भइरहेको प्रहरीले जनाएको छ ।