अछाम- रामारोशन घुम्न आउँदा स्थानीय प्रशासनद्वारा बाटैमा रोकिएका विभिन्न देशका पर्यटकलाई गृह मन्त्रालयले सर्तसहितको अनुमति दिएको छ । रोकिएपछि अलपत्र विदेशीका टोलीलाई बुधबार गृहमन्त्रालयले जिल्ला प्रशासन र जिल्ला प्रहरी कार्यालयलाई नरोक्न निर्देशन दिएको हो ।
२५ भन्दा बढी मुलुकका पर्यटक कम्तीमा एक महिना बस्ने उद्देश्यले गत साता नै अछामको सीमामा पुगेका थिए । लामो समय रामारोशन क्षेत्रमा धेरै संख्यामा बस्ने भएपछि सरकारका विभिन्न तहबाट अनुमति ल्याएर आए मात्रै उनीहरुको उद्देश्यअनुसार छाड्न सकिने भन्दै स्थानीय प्रशासनले बाटैमा रोकेको थियो ।
अछामको पूर्वी सीमा बेलखेत, पश्चिम चौखुट्टे र जयगढ बजारमा पुगेका २ सय ५० जना विदेशीलाई बुधबार पर्यटकीय क्षेत्र रामारोशनमा जाने अनुमति दिइएको अछामका प्रहरी प्रमुख डीएसपी सन्तोष पाठले बताए । ‘नेपालको कानुन उल्लंघन नहुने गरी उनीहरुले त्यता बस्ने गरी मौखिक जानकारी दिएर पठाइएको छ‚’ उनले भने ,‘गृहमन्त्रालयबाट आज (बिहीबार) सर्तसहितको लिखित निर्देशन आउने भनिएको छ ।’ पर्यटकले गैरकानुनी क्रियाकलाप गरेको पाइएमा तत्काल पक्राउ गरेर कारबाही गरिने उनले बताए ।
चौखुट्टे , बेलखेत र जयगढमा रहेका २ सय ५० जना विदेशीमध्ये बुधबार साँझसम्म ५० जना रामारोशनमा गइसकेका छन् । बाँकी २ सय जना पनि जाने क्रममा छन् । प्रहरीका अनुसार अन्य विदेशीहरु पनि रामारोशन जानका लागि आइरहेका छन् । रामारोशन क्षेत्रमा नेपाल प्रहरी र सशस्त्रको संख्या थपेर उनीहरुको क्रियाकलापमाथि निगरानी गर्न थालिएको छ ।
रामारोशन क्षेत्रमा आएका विदेशी पर्यटकलाई स्वागतसहित गन्तव्यमा पठाइने रामारोशन गाउँपालिकाका अध्यक्ष मानबहादुर साउदले बताए । ‘अहिलेसम्म आन्तरिक पर्यटक पनि नपुगेको ठाउँमा यति धेरै संख्यामा विदेशी पर्यटक आउनु रामारोशनका लागि सकरात्मक हो । उनीहरुलाई रामारोशन गाउँपालिकाले सहयोग गर्छ‚’ उनले भने ।
