बाजुरा- कोल्टीबाट रिफर गरिएका बिरामीको जहाजमै मृत्यु भएको छ । शनिवार मृत्यु हुनेमा स्वामिकार्तिक गाउँपालिका वडा नम्बर ३ का दलजित कटेल रहेका छन् ।
उनलाई कोल्टी प्राथमिक स्वास्थ्य केन्द्रबाट थप उपचारका लागि नेपालगन्ज रेफर गरिएको थियो।
कटेल एपेन्डिसाइडका बिरामी रहेको बुझिएको छ ।
उपचारका लागि सिता एयरको विमानमा शनिवार दिउसो १२ः३३ बजे कोल्टीबाट नेपालगन्जका लागि उडेको थियो । बिच आकाशमै कटेलको ज्यान गएको विमानमा सवार लक्ष्मण जोशीले जानकारी दिए ।
उनले भने ‘प्लेन उडेको केही समयमा उनलाई गाह्रो भएपश्चात् विमान परिचारिका अगाडि आएर कोही स्वास्थ्यकर्मी हुनुहुन्छ कि रु भनेर सोधेका थिए।
त्यसपछि उनले पाईलटसंग के कुरा गर्नुभयो थाहा भएन । पाईलटसंग पानी मागेर बिरामीलाई खुवाउनु साथै बिरामीको सिटमै उभिएर हर प्रयास गरे। तर बिच आकाश उडीलेक आसपास पुरै अचेत भैसकेका थिए । पुनः अगाडि आएर पाईलटसंग के कुरा गरे, थाहा भएन।
प्लेनको स्पिड पनि बढी नै थियो। पाईलटले पनि चाँडो पुर्याउन सकेमा बचाउन सकिन्छ कि भनेर प्रयास गरेको हुनसक्छ । विमान परिचारिका कोल्टीबाट नेपालगन्जसम्म उनको सेवामा उभिएर सहयोग गरे। हामी नेपालगन्ज २६ मिनेटमा पुगिसकेका थियौ । नेपालगन्ज एयरपोर्ट पुग्नु अगाडि नै उनले देह त्याग गरिसकेका रहेछन् ।
