डडेल्धुरा- डडेल्धुरा जिल्लामा सुदूरपश्चिमको माग आपूर्ति गर्न बृहत वन नर्सरी स्थापना भएको छ । जिल्लाको अजयमेरु गाउँपालिका वडा नंं ३ सिरोली गाउँमा बहुमूल्य जडीबुटिजन्य, पशुपालनका लागि बिभिन्न डालेघाँस, फलफूलदेखि वातावरणीय संरक्षणका बोटबिरुवाहरु निजीस्तरको फर्मद्वारा उत्पादन शुरु गरिएको हो ।
भद्रपुर एकीकृत कृषि तथा पशुपंक्षी फार्मबाट अहिले तिमुर, बोधिचित्त, रक्तचन्दन, श्रीखण्ड, तेजपात, ओखर, कागती, बाँस तथा बिभिन्न डालेघाँसहरु लगायतका २५ प्रजातीका बोटबिरुवाहरु गएको फागुनमा शुरु गरिएको फार्मबाट बिरुवा उत्पादन गरि करिब १५ लाख बराबरको आम्दानी लिन पनि सफल भएको फार्मका सल्लाहकार एवं सुदूरपश्चिम क्षेत्रीय वन निर्देशक कृष्णदत्त भट्टले जानकारी दिए ।
डडेल्धुरा वन नर्सरीका लागि उपयुक्त हावापानी भएकोले सुदूरपश्चिमका पहाडी जिल्लालाई लक्षित गर्दै माटो सुहाउँदो बोटबिरुवा उत्पादन गरि आयआर्जनका माध्यम सिर्जना गर्ने र स्थानीय परिबेशमै फलफूलका कलमी स्थानीय बोटबिरुवाको आपुर्ति गर्ने गरि श्रोतकेन्द्र स्थापना गर्ने लक्ष्य फार्मको रहेको फार्म संचालकको भनाई छ ।
करिब ६० रोपनीमा फार्मले बोटबिरुवा उत्पादन मात्र नगरि २४ लाख लगानीमा करिब तिन सय बाख्रापलनका लागि व्यवस्थित बाख्रा खोर पनि निर्माण गरेको छ जसमध्ये १२ लाख भेटेरिनरी अस्पताल तथा पशु सेवा विज्ञ केन्द्र डडेल्धुराले अनुदान सहयोग गरेको छ भने १२ लाख लगानी स्वयं व्यवसायीले गरेको कृषक व्यवसायी भट्टले बताए ।
वन नर्सरी स्थापना भए पछि सुदूरपश्चिमका सात पहाडी जिल्लाहरुलाई पशुपालनका लागि आवश्यक पर्ने लहरेपिपल, नेपियर, डालेघाँस लगायतका बोटबिरुवाहरु किसानलाई बितरण गर्न खरिदका लागि सहज र सस्तो पनि भएको भेटेरिनरी अस्पताल तथा पशु सेवा विज्ञ केन्द्र डडेल्धुराका कार्यालय प्रमुख देवराज भट्टले बताए ।
नर्सरी स्थापना भएपछि चार जनालाई वार्षिक तलब र १० जनालाई मौसम अनुसारको कामकाजमा खटिने गरि पटके पारश्रमिक दिई बेरोजगार युवाहरुलाई रोजगार समेत दिएपछि स्थानीय युवाहरु पनि खुशी भएका छन् ।
