बाजुरा- बाजुराको बूढीगङ्गा नगरपालिकामा रहेको बेलामाण्डौ डेल्टा सडक खण्डको बार्जुगाड नदिमा निर्माणाधीन पुल सात वर्ष बितिसक्दा पनि दुई वटा पिलर मात्र तयार भएको छ । ठेकेदार र नियामक निकायको मिलेमतोमा ढिलासुस्ती हुँदा ४५ मिटर लम्बाइको पक्की पुल निर्माणको काममा ढिलाइ भएको छ ।
२०७२ सालमा अछामको साउँद एडभेन्चर जेभीले निर्माणको जिम्मा लिएको थियो । दुई करोड रुपियाँ लागतमा निर्माण हुने उक्त पुल २०७६ साल असारसम्ममा सम्पन्न हुनु पर्ने भए पनि तीन वर्ष ढिलाइ हुँदा समेत १० प्रतिशत समेत काम हुन सकेको छैन ।
खप्तड छेडेदह गाउँपालिका वडा नं ३ पुडावाउँलाका स्थानीय खडक खड्काले खप्तड छेडेदह ३ बूढीगङ्गा नगरपालिका ४ को बिचमा पर्ने बार्जुगाड नदिमा निर्माणाधीन पुलको काम सात वर्ष सम्म पनि सम्पन्न नभएपछि अहिले यहाँका स्थानीयले बर्खाको समयमा खोला तर्न निकै सास्ती खेप्दै आएको बताए । उनले, पुलको छेउमै मेरो पसल छ, अहिले सम्म पुल निर्माण भएको छैन । पुल निर्माण नहुँदा बर्खाको समय यहाँका बालबालिकाहरूलाई विद्यालयमा जान आउन निकै समस्या भएको उनको गुनासो छ ।
गत बर्खाको समयमा कयौँ बालबालिकाहरूले खोला तर्न नसकेपछि आफैले उनीहरूलाई विद्यालयमा जाने बेलामा पीट्यू लाएर खोला वारपार गर्ने गरेको खड्काले बताए । बाजुराको बेलामाण्डौ डेल्टा सडक खण्डको बार्जुगाड नदिमा ७ वर्ष देखि पक्की पुल निर्माणको काम अलपत्र परेको छ खड्काले भने ,‘पुल निर्माण गर्ने म्याद सकिन्छ , ठेकेदारले फेरि म्याद थप्दै जान्छन् हाम्रो समस्या भने जसो पहिला थियो अहिले पनि उसै छ ।’
स्थानीय खडक खड्काका अनुसार ठेकेदारले बदमासी गर्छ तर्र सडक पूर्वाधार विकास कार्यालयले समेत ठेकेदारसँग मिलेमतो गरी आर्थिक प्रलोभनमा परी नियमनमा कडाइ गर्दैन । यता पुल निर्माणको जिम्मा लिएका साउँद एडभेन्चर जेभीका प्रोपराइटर ईश्वर साउँदले, पहिला ले आउट गरेको ठाउँमा पहिरोले जमिन बगाएपछि अर्को ठाउँको स्वास्लटेष्ट गर्दा समय लागेपछि पुल निर्माणको काम ढिलाइ भएको बताए ।
पूर्वाधार विकास कार्यालय साँफेबगरका कार्यालय प्रमुख रुद्ध बहादुर बोगटीले पुल निर्माणको काम कार्य सडक पूर्वाधार विकास कार्यालय साँफेले लिएको बताए । उनले, पुल निर्माणको जिम्मा लिएको ठेकेदारको लापरबाहीका कारण काम हुन नसकेपछि फेरि अहिले एक वर्षको म्याद थप गरिएको छ, त्यो म्यादसम्म पनि काम गर्न नसकेपछि आवश्यक अनुसार अर्को विकल्प खोजिने बताए ।
