कृष्णापुरमा सुरु हुँदै दोस्रो मेयर कप फुटबल र पहिलो उपमेयर कप भलिबल प्रतियोगिता

कञ्चनपुर- कञ्चनपुरको कृष्णपुर नगरपालिकामा यही जेठ १७ गतेदेखि दोस्रो मेयर कप फुटबल प्रतियोगिता २०८२ तथा पहिलो उपमेयर कप महिला भलिबल प्रतियोगिता सुरु हुने भएको छ । ‘हाम्रो सामूहिक गोल लागू औषध विरुद्धको खेल’ भन्ने मूल नारासहित आयोजना हुने उक्त प्रतियोगितामा प्रत्येक वडाबाट टिमको सहभागिता रहनेछ ।

प्रतियोगिता सिङ्गापुर सामुदायिक वन उपभोक्ता समूहको खेलमैदानमा सञ्चालन हुनेछ । प्रतियोगिताको तयारीबारे आयोजित पत्रकार सम्मेलनमा नगरप्रमुख हेमराज ओझाले मेयर कप फुटबल र उपमेयर कप भलिबलको ट्रफी अनावरण गरेका थिए ।

खेल संयोजक खेमराज चौधरीका अनुसार, फुटबल तथा भलिबल दुवै खेलका विजेताले नगद रु. ५१,१५१ प्राप्त गर्नेछ भने उपविजेताले रु. ३१,१३१ प्राप्त गर्नेछन्। साथै, सान्त्वना पुरस्कारस्वरूप रु. ११,१११ सहित ट्रफी, मेडल र प्रमाणपत्र प्रदान गरिनेछ।

कार्यक्रममा बोल्दै नगरप्रमुख ओझाले खेलकुदलाई नगरपालिका मात्र नभई राष्ट्रकै पहिचानको रूपमा लिनुपर्ने बताए । “खेलकुद युवालाई अनुशासनमा राख्ने, तन्दुरुस्ती बढाउने र समाजमा सकारात्मक परिवर्तन ल्याउने माध्यम हो,” उनले भने ।

उनले पछिल्लो समय युवायुवतीहरू लागू औषधजस्ता कुलतमा फसिरहेको अवस्थामा खेलकुद नै उनीहरूलाई सही मार्गमा डो-याउने सशक्त माध्यम भएको उल्लेख गरे । प्रतियोगिता सञ्चालनको क्रममा मौसम र आवश्यकतालाई ध्यानमा राखी समयतालिका तय गरिने र सबै खेलहरू तोकिएको समयमै सम्पन्न गरिने जानकारी आयोजकले दिएको छ ।

खेलाडीहरूको अनुशासन कायम राख्न विशेष नियमहरू लागू गरिनेछ। खेलाडीले गल्ती गरेमा रु. १५० जरिवाना तिर्नुपर्नेछ भने रातो कार्ड पाउने खेलाडीले अर्को खेल खेल्न नपाउने व्यवस्था गरिएको छ ।

‘कृष्णपुरको शान – खेलमार्फत महिला सशक्तिकरण’ भन्ने मूल मन्त्रका साथ सञ्चालन हुने प्रतियोगिताले महिलाहरूलाई खेलमा सहभागी गराई आत्मविश्वास र उत्साह बढाउने अपेक्षा गरिएको छ। खेल संयोजक चौधरीका अनुसार, सबै वडाबाट टिमहरूको सहभागिता भइसकेको छ ।

प्रतियोगिताको उद्देश्य स्थानीयस्तरमा खेल संस्कृतिको विकास, युवाहरूलाई सकारात्मक क्रियाकलापमा संलग्न गराउने, र समग्र समाजमा अनुशासन तथा पहिचानको भावना विकास गर्नु रहेको छ । साथै, नगरभित्रका जनप्रतिनिधि र कर्मचारीहरूबीच फुटबल पेनाल्टी सुट आउट खेल पनि सञ्चालन गरिने जानकारी दिइएको छ ।