अत्तरिया- कैलालीको गोदावरी नगरपालिका वडा नं. २ मा रहेको सत्यवती एकेडेमीले कक्षा ६ सम्मका विद्यार्थी लक्षित प्रथम सत्यवती छात्र फुटबल कप–२०८२ आयोजना गर्ने भएको छ । विद्यालयले विद्यार्थीहरूमा फुटबल प्रतिभा पहिचान, खेलप्रति रुचि अभिवृद्धि तथा विद्युतीय उपकरणको दुरुपयोग न्यून गर्न उद्देश्य राखी प्रतियोगिता आयोजना गरिएको जानकारी दिएको छ ।
प्रतियोगिताका लागि टिम दर्ताको अन्तिम मिति २०८२ मंसिर २४ तय गरिएको छ । टाइसेट तथा ट्रफि सार्वजनिक कार्यक्रम मंसिर २७ गते हुनेछ भने मंसिर २९ गतेदेखि खेल बाँकी तालिका अनुसार सुरु हुनेछ । खेलहरू सत्यवती फुटबल मैदानमा सञ्चालन गरिनेछ ।
आयोजकका अनुसार प्रथम हुने टिमले रु २० हजार, ट्रफि तथा मेडल प्राप्त गर्नेछ भने द्वितीय हुने टिमले रु १० हजार, ट्रफि तथा मेडल प्राप्त गर्नेछ । साथै प्रत्येक खेलमा प्लेयर अफ द म्याच घोषणाको व्यवस्था रहको छ । उत्कृष्ट गोलरक्षक, उत्कृष्ट डिफेन्डर, सर्वाधिक गोलकर्ता र प्लेयर अफ द टुर्नामेन्ट का रूपमा पनि विशेष विधागत पुरस्कार प्रदान गरिनेछ ।
खेल FIFA मापदण्डअनुसार १५–१५ मिनेटका हाफमा संचालन गरिनेछ र प्रतियोगिता नकआउट आधारमा हुनेछ । कक्षा ६ वा सोभन्दा तलका विद्यार्थी मात्र सहभागी हुन पाउनेछन् । प्रतियोगितामा खेल संयोजकको जिम्मा सन्तोष कार्कीलाई दिइएको छ ।
