अछाम । पार्टीको हित विपरीत कार्य गरेको भन्दै नेकपा (एमाले) अछामले छ जनाको जिम्मेवारी खोसेको छ । पार्टीको विधान विपरीत कार्यमा संलग्न भएको भन्दै एक विज्ञप्ति प्रकाशित गरेर पाँच जिल्ला सदस्य र एक नगर अध्यक्षको जिम्मेवारीबाट निष्कासन गरेको हो ।
जिम्मेवारीमुक्त हुनुहुनेमा जिल्ला कमिटीका सचिवालय सदस्य तथा सङ्गठन विभाग प्रमुख प्रकाश शाह, सचिवालय सदस्य सागरसिंह बाब्ली, जिल्ला सदस्य बलबहादुर कुँवर, शङ्कर भुल, रतन रावल र साँफेबगर नगर कमिटी अध्यक्ष ढकेन्द्र कुँवर रहेका छन् । छ जनाले पार्टी विधानको धारा ८० को उपधारा १, २, ३, ४, ५, १२ र १३ विपरीत गतिविधि गर्नुभएकोले धारा ८१ को (१) बमोजिम पार्टी कमिटीको पदीय जिम्मेवारीबाट बुधवारबाटै लागु हुने गरी निष्कासन गरिएको प्रेस विज्ञप्तिमा उल्लेख छ ।
पार्टीका आधिकारिक व्यक्तिलाई कुनै पनि जानकारी नदिई एमाले छोडेको भ्रमपूर्ण समाचारलाई सामाजिक सञ्जाल तथा सञ्चार माध्यमबाट सम्प्रेषण गरेको, पार्टीलाई कमजोर पार्न सञ्चालन गरिएको मातृभूमि जागरण अभियान नेपाल नामक जुलुसमा समावेश भएर प्रधानमन्त्री पार्टीका अध्यक्ष केपी शर्मा वली विरुद्ध अलोकतान्त्रिक र अशोभनीय नाराबाजी र पार्टी विरुद्धको जुलुसमा सक्रिय भूमिका खेलेको विज्ञप्तिमा उल्लेख गरिएको छ ।
जिम्मेवारीमा रहेका पदाधिकारी तथा सदस्यहरूबाट पार्टी हित विपरीत गतिविधि गरेको भन्दै यसअघि स्पष्टीकरण सोधिएकोमा उनीहरूले आगामी दिनमा पार्टीप्रति पूर्ण प्रतिबद्ध रहने आत्मालोचना सहितको लिखित पेस गरेपछि एक पटकका लागि कारबाही प्रक्रिया अघि नबढाउने जिल्ला कमिटीको सचिवालयले निर्णय गरेको विज्ञप्तिमा उल्लेख छ ।
गएको कात्तिक २६ गतेको सचिवालय बैठकले कारबाही प्रक्रिया अघि नबढाउने निर्णय गरे पनि पुनः पार्टी विरुद्धका गतिविधिमा मुख्य मतियार भएको विज्ञप्तिमा उल्लेख गरिएको छ । जिम्मेवारीमुक्त गरिएका छ जना व्यक्ति साँफेबगर नगरपालिका निवासी हुन् । उनीहरू डा। भीम रावल पक्षका मानिन्छन् । एमालेले साधारण सदस्यसमेतबाट निष्कासन गरेपछि मातृभूमि अभियानमा संलग्न भएर डा। रावल अछाममा छन्।