भारतबाट बढेर आयो पेट्रोलको मूल्य

काठमाडौं- भारतीय आयल कर्पोरेसन ९आईओसी०बाट इन्धनको मूल्य बढेर आएको छ । नेपाल आयल निगमलाई आईओसीले पठाएको मूल्य सूचीअनुसार पेट्रोलमा ८ रुपैयाँ २५ पैसा बढेर आएको छ भने डिजेलमा ७ रुपैयाँ ६१ पैसा बढेर आएको छ ।

आयल निगमले १५ दिन अगाडिबाट मात्रै स्वाचालित मूल्य प्रणाली लागुु गरेकोले अब आजै रातिबाट इन्धनको मूल्य बढ्ने भएको छ । निगमका अनुसार पेट्रोलमा कर र भन्सार जोडेर प्रतिलिटर १० रुपैयाँ बढ्ने भएको छ भने डिजेलमा ८ रुपैयाँ बढ्ने छ ।

निगमका अनुसार खाना पकाउने ग्यासको मूल्य भने प्रति सिलिण्डर १ सय रुपैयाँ घटेर आएको छ । नयाँ मूल्य सूचीअनुसार ग्यासको मूल्य घट्छ भने पेट्रोल, डिजेल र हवाई इन्धनमा मूल्य बढ्ने भएको छ ।

हवाई इन्धनको मूल्य पनि प्रति लिटर ८ रुपैयाँ बढेर आएकोले आज राति १२ बजेबाट लागु हुने गरी पेट्रोलियम पदार्थको मूल्य बृद्धि गर्ने तयारीमा आयल निगम छ ।

निगमले स्वचालित मूल्य प्रणालीअनुसार इन्धनको मूल्य समायोजन भएको निर्णय गर्न साँझ ५ बजे सञ्चालक समितिको बैठक बोलाएको पनि निगम स्रोतले जानकारी दिएको छ ।

गत वर्ष असार ३१ गते परल मूल्यमा डिजेलमा २ प्रतिशत र पेट्रोलमा २.५ प्रतिशत राखेर स्वचालित बिक्री प्रणाली लागु गरेको भए पनि निगमले भने गएको १५ दिन अगाडि मात्रै यसलाई कार्यान्वयनमा ल्याएको हो ।

स्वचालित मूल्यअनुसार हरेक महिनाको १ र १६ तारिखमा भारतबाट प्राप्त हुने नयाँ मूल्य सूचीको आधारमा पेट्रोलियम पदार्थको मूल्य घटबढ हुने छ । निगमले मूल्य बढेर आउँदा बढाउने र घटेर आउँदा घटाउने छ ।

Loading...