रसुवाको भोटेकोशी नदीमा आएको बाढीपछि सम्पर्कविहीन भएका सुदूरपश्चिम प्रदेशका १४० जनामध्ये १० जना सकुशल सम्पर्कमा आएका छन्।
प्रदेश प्रहरी कार्यालयका अनुसार कञ्चनपुरको भीमदत्त नगरपालिका–३ का सुनिल चौधरी, वडा नम्बर ६ की चन्दा जोशी, वेदकोट नगरपालिकाका अजय राना, सुरेश राना र सन्तोष राना, बेलौरीका नवीन चौधरी र आदर्श चौधरी तथा कञ्चनपुरकै राकेश भट्ट र प्रदीप चन्द सकुशल भेटिएका हुन्। डडेल्धुराका सुनिल बुढामगर पनि सकुशल सम्पर्कमा आएका छन्।
प्रदेश प्रहरी कार्यालयका प्रवक्ता प्रहरी वरिष्ठ उपरीक्षक पदमबहादुर बिष्टका अनुसार सकुशल भेटिएकामध्ये सात जना हाइड्रोपावरमा कार्यरत छन् भने चन्दा जोशी नर्सिङकी विद्यार्थी हुन्। अन्य दुई जना के कामका लागि रसुवा पुगेका थिए भन्ने खुलेको छैन।
भोटेकोशी नदीमा आएको बाढीपछि सुदूरपश्चिमका विभिन्न जिल्लाका १४० जना सम्पर्कविहीन भएको विवरण प्राप्त भएको थियो। १० जना सकुशल सम्पर्कमा आएसँगै अब १३० जना अझै सम्पर्कविहीन छन्।
सम्पर्कविहीन रहेकाहरूको खोजी तथा उद्धारका लागि सम्बन्धित निकायले प्रयास जारी राखेको प्रहरीले जनाएको छ।
